Ang silot nga kamatayon

Sa paglingkod ni President-elect Rodrigo Duterte sa Malacañang unya sa udtong tutok karong Hunyo 30, maoy usa sa unahon niya pagtagad ang pagpabalik sa silot nga kamatayon.

Gani ang umaabot nga Speaker of the House nga si Congressman Pantaleon Alvarez namahayag na nga sulod sa usa ka tuig human molingkod si Digong sa Malacañang ila na nga mapalabang ang balaod nga magbanhaw sa kamatayon.

Ang silot nga kamatayon dili basta-basta nga mapalabang sa Kongreso, ilabi na sa Senado nga ang mayoriya mga sakop sa Partido Liberal ug mga giilang pro-life.

Sa ubos balay balauranan mapadali siguro ni Alvarez ang pagpalabang sa nahisgutang balaod tungod kay nasayod na kita nga daghang sakop sa Kongreso, pwera lang sa uban, mga balimbing ug walay mga baruganan.

Busa makaingon ako nga tingali sa Kongreso makaya ang pagpalusot sa pagpabalik sa balaod nga silot kamatayon. Pero sa Senado nanginahanglan pa sila og milagro ilabi na kun magpabilin si Senador Franklin Drilon isip presidente sa Senado.

Sigun sa akong ihap, kini kun wala ako masayop, mayoriya sa mga senador supak sa silot nga kamatayon. Gani ang uban kanila mibotar man sa pagwagtang niini sa panahon pa ni kanhi presidente Gloria Macapagal Arroyo.

Bisan si Senador Koko Pimentel nga presidente sa partido nga PDP-Laban nga nahisakop si Duterte, kadudahan pa kun mosuporta ba sa pagpabalik sa silot nga kamatayon tungod sa lig-on nga pundasyon sa iyang pamilya sa pagka mahinungdanon sa kinabuhi.

Gani, ang iya man nga amahan nga si Senador Nene Pimentel ang nangamahan sa Senado sa pagwagtang sa silot nga kamatayon. Hinuon, dili mabalaka ang gobiyerno ni Digong, kun dili man gayud mapalabang sa Kongreso ang pagbanhaw sa death penalty.

Pagka karon wala na kini kinahanglana, kay karon pa lang gani nga wala pay silot kamatayon, daghan na man nga giingon nga mga badlungon sa katilingban ang gisilotan na og kamatayon sa mga polis ug mga giingon nga vigilantes.