Atimana ang BFP

Nagmalampuson ang gipahigayon nato nga eleksyon kaniadtong Mayo 9. Hapsay, malinawon ug walay mga alarma sa sunog atol sa maong adlaw.

Daghan ang nagpakabana ug nag-exercise sa ilang katungod sa pagpili sa mga lider sa atong nasud nga maoy modumala kanato sulod sa unom ka tuig alang sa presidente, ug tulo ka tuig sa mga lokal nga opisyal.

Unta, tumanon nila ang gisaad nga mga reporma ug paglimpyo sa gobiyerno. Ug labaw sa tanan, ila unta nga hatagan og dakong pagtagad ang kabomberohan, pinaagi sa pag-modernize sa fire fighting equipments.

Samtang sagunson ang dagkong alarma sa sunog nga gitubag sa atong kabomberohan sa dakbayan sa Sugbo nga nag-involve og grass fire.

Ang nakalisod kay ang maong mga sunog niulbo sa mountain barangay nga dili na matungas sa atong mga fire trucks.

Unsa may sagad hinungdan niini? Ang sagad nga hinungdan mao ang pagpataka og labay sa upos sa sigarilyo. Kun atong nabantayan, tungod sa grabeng kainit, uga kaayo ang atong mga sagbot ug maoy rason nga dali kining masunog.

Busa pahimangnoan na pud nato ang manigarilyo sa dili pagpataka og labay sa ilang mga upos aron malikayan ang sunog.

Sa katapusan, nakugang kita sa usa ka trahedya diin pito intawon ka kinabuhi ang nakalas sa sunog nga niulbo duol sa Taboan Market. Sa pasiunang pakisusi, nasayran nga ang wala mapalong nga lampara ang hinungdan sa sunog.

Kadaghan na man nato kini mahisgoti sa atong lindog nga kun mogamit kita og kandila o lampara, isiguro nga layo kini sa kurtina o ba kaha sa mga butang nga daling masunog.

Labaw sa tanan, isiguro nga mapalong kini sa dili pa matulog. Atong sundon ang mga fire safety tips nga gibalikbalik namo paghatag kaninyo aron maglikay sa sunog.

Unta wala na’y susamang insidente nga adunay makalas nga kinabuhi tungod lang sa atong klaro ug tataw kaayo nga wala pagsunod sa mga pahimangno sa kabomberohan.