Recycled nga kampanya

Ang mga hunahuna nga gipadayag dinhi iya ra sa tagsulat ug wala’y labot ang Banat News ug mga sakop niini.

Nag-iyahay sa ilang gimik ang mga nangambisyong makalingkod sa Malacañang aron mamuno sa kapin 100 milyones ka mga Pilipino.

Silang tanan niwadwad sa ilang mga plataporma de gobiyerno nga sa ilang pag-analisar maoy makasulbad sa problema sa nasud apan sagad kanila nisentro lamang sa kurapsyon, mga krimen, kapobrehon, kakuwang sa trabaho, edukasyon, panglawas, agrikultura, imprastraktura, foreign policies ug uban pa.

Kaning mga problemaha mao gihapon ang mga gipanaad sa mga nanglabay nga mga presidente, gi-recycle lang og balik sa mga kandidato aron makadani na usab og mga botante, kay kini halinon ug dali kaayong ipangilad. Sa pagkatinuod, nasolusyonan baya gyud ang ubang mga problema sa matag presidenteng nakalingkod, apan kuwang pa. 

Dili ni tungod sa kurapsyon kondili tungod sa kadaghan sa mga kontra nga di gustong mohumot ang administrasyon.  Mao kini ang sistema sukad pa kaniadto.

Tungod sa pagpangdaot, di makadaog ang kandidato sa administrasyon mao nga di mapadayon ang mga maayong programa nga nasugdan. Sa laktod pagkaestorya, sige lang pugas way ani. Ang resulta daghan ang madiskontento, dinhi mamuhonan og dako ang mga kontra aron madaot og maayo ang kandidato sa administrasyon.

 Unta, una pa kita motuo ani nga mga propaganda, angay natong hinuktokan og maayo sa atong hunahuna ug kasingkasing kun ang usa ka kandidato angayan ba gyud nga palingkuron ug kompleto ba siya sa hiyas ug katakos aron pangulohan ang nasud.

Sigurohon nato nga kining molingkod makatabang sa atong mga anak nga nag-edad na karon og 12 hangtud 17 anyos. Kay ang presidente molingkod man og unom ka tuig nagpasabot nga ang 12-anyos karon 18-anyos na sa kataposang tuig sa presidenteng modaog karon.

Nianang edara maoy sagad sa kabatan-on nga makahuman sa ilang senior high school, ang adunay ikasarang pagpadayon og eskuyla sa kolehiyo apan kasagaran kanila mangita na og trabaho aron makatabang sa mga ginikanan o sa kaugalingon.

Unsaon na lang kun ang modaog  nga presidente maoy makapaguba sa imahe sa Pilipinas ug makaingon nga manglayas ang mga negosyante ug maka-discourage sa mga langyaw nga investors?

Way laing mabasol kun nganong madugang sa mga unemployed kining mga bataa unom ka tuig gikan karon kundili ang mga botanteng nagpadala sa ilad ug bolatik sa ilang gibotarang kandidato. Kinahanglan nga ang molingkod nga pangulo manager o kadtong adunay eksperiyensya nga makadani og mga mamuhonan ug dili kadtong makaabog na hinuon sa kalamboan.

Mag-unsa man nang popular kun dili kini makahatag og daghang trabaho sa katawhan?

Mosamot kadaghan ang kabus kun walay oportunidad nga makatrabaho. Ang kakuwang og oportunidad maoy hinungdan nganong daghan ang kabus sa Pilipinas. Ang kakabus mao usab ang hinungdan nganong daghan ang krimen kay wa nay ikapakaon sa pamilya. Asa may angay unahon og sulbad? Krimen o ang kakuwang sa oportunidad?