Mobarug sa moralidad

Ang mga panghitabo human sa pamahayag ni people’s champ Manny Pacquiao pagkumparar niya sa pakighilawas sa babaye ngadto sa babaye o lalaki ngadto sa lalaki, ngadto sa mananap, usa ka sukdanan sa gitas-on o gimub-on sa moralidad sa komunidad.

Nalipay lang ko kay nasayop ko sa akong pagtuo.

Sa dihang gipagawas ang video footage sa interview ni Pacman nga nagbatbat sa bersikulo sa Bibliya mahitungod sa relasyon sa mga bayot ug tomboy, miani kini og mga pagsaway sa LGBT community.

Duha ka mayuhang nga mga sikat nga personalidad sa usa ka dakong TV network maoy grabeng nakasaway sa boksidor. Miresulta kini sa pagtaktak ni Manny isip endorser sa Nike.

Apan puwerte nakong lipaya sa pag-ukab nako sa Facebook tungod sa kadaghan pa diay sa mga tawong gustong mobarug kun unsay moral batok sa imoralidad.

Nahibalo naman kita nga ang same sex relationship samot na ang same-sex marriage nga gihimo na nga legal sa ubang kanasuran sa kalibutan pulos mga imoral nga buhat nga wala mahasubay sa gitawag nato og ‘natural order of humanity.’

Apan dili buot ipasabot nga legal na kini sa ubang mga nasud, moral na kini sa mata sa komunidad. Sa Facebook, daghan ang misimpatiya kang Manny.

Samot na sa dihang gi-post ang kinatibuk-ang interview nga makit-an ang tinuoray’ng intensiyon sa kongresista sa Sarangani nga dili diay pagbugal-bugal sa mga bayot ug tomboy, kun dili mibatbat siya og bersikulo sa Bibliya human gipangutana sa iyang baruganan sa isyu sa same sex marriage.

Mahalon nga sapatos ang Nike, apan daghan sa mga nanag-iya niini ang misunog agi’g simpatiya kang Manny sa pagtaktak kaniya isip endorser sa maong brand.

Ning maong panghitabo, duha ka butang ang akong nakit-an. Una, ang mga Filipino mobarug pa gyud diay sa moralidad, bisan nagkadako ang komunidad sa mga bayot ug tomboy; ug ikaduha, mobarug kita sa atong isi’g ka Filipino.

Bisan kita na lang sa Asya ug ikaduha sa kalibutan ang nasud nga wala mohimong legal sa same-sex marriage, ang nahitabo kang Manny nagpakita nato nga hingpit pa gihapon natong barugan unsay husto: nga ang kaminyoon alang ra sa lalaki ug babaye nga maoy gimbut-an sa balaod ug sa kinaiyahan.

Bisan sikat nga brand ang Nike, apan dili kini iya sa usa ka Filipino. Tingali, ang ubang misunog sa ilang Nike nga sapatos mihimo niini dili tungod kay miuyon sila sa gibatbat nga bersikulo sa Bibliya, kun dili milaban sila kang Manny nga migawas nga biktima sa harassment sa gitawag nila sa Facebook og “bully LGBT community.”

Ang akong punto alang niini mubo ra: Walay diskriminasyon nga gihimo batok sa mga igsuon natong mga bayot ug tomboy, kon dili, ang ilang pagkatawo ang atong gikaintapan, kon dili ang ilang batasan (behavior) nga usahay dili na madawat sa mapailobon nga mga mata.