Ang makapamenus sa pagkatawo

Dili malisud nga ilhon ang matang sa pagkatawo, bisa'g kinsa o unsa siya nga nakiglambigit sa mga tawo. Kay ato siyang makita o matugkad diha sa iyang sinultihan ug linihokan, nga sayon ra hubaron ang tinuod nga motibo.

Dinhi ang kadaghanan wala kaayo makamatikod, nga kompiyansa ra sa kaugalingon nga way pakabana sa pagtuon niini. Aron unta dili matibhangan ang kaligdong sa atong pagkatawo. Angay sud-ongon nga iseguro ang pagpanamin sa kaugalingon, sa ingon epektibo kita kanunay sa mga tawo'ng atubangon.

Hinuon, alang niadtong naninguha sa pagkat-on ini nga mamahimo silang epektibo sa pakigharong, nga ugmaron dili lang ang iyang interes o kaayohan, kundi hasta ang may kalambigitan sa iyang mga gitinguha. Pipila lang kini sa mga yano'ng ideya nga himuon nato nga tamdanan sa pagmatngon;

* Likayan nga magliraw ang kalimutaw— Kun makighinabi sa grupo  o sa panagkatigum. Kay sabton kini'ng taphaw nga way respeto sa atong  pakig-atubang. Luhag ang pangisip nga wala sa hunahuna, nga mora'g pinugos ingon nga nagpakaaron-ingnon. Dili sinsero sa katuyoang igo lang nga nag-usik og oras, kay di masabot ang katugkaran sa mga mensahe nga gipadayag.

* Mao ni kun unsa kini — ang kanunay paglaktud nga way gana og makapalaay nga pagpasabot sa katuyoan o kasayuran diha sa pundok nga gipadayagan. Imbis ihan-ay ang detalyado'ng makapukaw og interes sa mga naminaw. Makamugna kini'g negatibo'ng reaksyon sa pagkatawo mo.

* Sa akong opinyon —maayo ang paghatag og opinion, isip kontribusyon sa maayo'ng panghunahuna, apan makapatahap kini nga nagdepensa  daan sa pagpadayag ini. Ingon sa wa ta'y kalabtanan sa diskusyon, masabtan kita nga wa pa'y hingpit nga preparasyon sa kahimoan sa oportunidad nga palambuon.