Alyado sa One Cebu ug UNA

Pormal na nga gianunsiyo sa One Cebu ang kandidato niini pagka-presidente alang sa eleksiyon karong umaabot nga Mayo. Sa niaging Lunes, gipahibalo sa maong partido nga adto kini mosuporta kang Bise Presidente Jejomar Binay sa United Nationalist Alliance.

Mismong si Winston Garcia, ang gubernatorial candidate sa One Cebu, ang mideklara niini. Matud niya nga ang ang track record ni Binay ug ang eksperensiya niini kabahin sa housing ug pagtabang sa mga overseas Filipino workers maoy nakapaaghat kanila pagsuporta kaniya.

Siguro mao kini ang bunga sa sige nga pag-anhi ni Binay sa Sugbo. Wala usab ako matingala sa lakang sa One Cebu pagsuporta kaniya. Kini tungod kay hagbay ra nga kaalyado niini si Binay, sa dihang gobernador pa si Congresswoman Gwen Garcia, ang kanhi pangulo sa One Cebu.

Hinuon nausab ang hangin alang kang Winston. Gikataho kini sa nangaging mga bulan nga morag paingon mosandig sa tandem ni Senadora Grace Poe ug Senador Chiz Escudero alang sa sunod nga piniliay.

Gani, matud niya, nga iya nang nakaestorya silang Poe ug Escudero mahitungod sa iyang mga plano alang sa lalawigan. Ug nga na-impressed kuno ang duha ug nga andam sila mutabang sa kanhi provincial board member aron matuman ang maong mga plano.

Apan nausab ang kamada. Imbis adto mosuporta nilang Poe ug Escudero sa Nationalist People’s Coalition, milihis si Winston ug didto na mipadpad sa UNA ang iyang suporta. Unsa kahay hinungdan niini?

Dako akong pagduda nga ang disqualification case nga kasamtangang giatubang ni Poe sa Korte Suprema maoy nagtuklod ni Winston pagtabok ngadto sa kampo ni Binay.           

Usa usab siguro sa rason sa pagsakay si Winston sa kampo ni Binay mao ang giingong pagsuporta ni Kongresman Ace Durano ug sa Bakod party sa ikalima nga distrito sa lalawigan kang Poe ug Escudero. Kahinumduman nga ang Bakod kaalyado ni Bise Gobernador Agnes Magpale, ang runningmate ni Gobernador Hilario Davide III sa sunod eleksiyon. Advantage kaha ni Winston ang iyang pagsuporta kang Binay? Wala pay usa nga nakahibalo. Apan dili ikalimod nga adunay daghang dumadapig usab si Binay dinhi sa Sugbo, ilabina sa kalungsoran, nga klaro nga mosuporta unya ni Winston ug sa One Cebu.