Mga “epal” sa Mandaue

Maayong himoan og polisiya sa Comelec nga tumanon usab sa mga kandidato ang “truth in advertising.” Kadaghanan sa mga political ads karon wala na gyuy kamatuoran.

Sama sa political ads ni Bise Presidente Jejomar Binay nga nagkanayong “haka-haka” lang ang mga kasong gisang-at batok kaniya.

Unsay haka-haka? Lima ka kasong Plunder ang giatubang ni Binay didto sa Ombudsman tungod sa overpricing sa P2.4 bilyones Makati City parking building, P1.3 bilyones nga Makati Science High School, P1.2 bilyones nga overpricing sa College of Nursing sa University of Makati, ug anomalosong transaksyon sa Boy Scouts of the Philippines.

Sa kadaghan sa kaso, ang Ombudsman padayon karon nga nag-imbestigar ug nangita’g ebidensiya. Dili makaingon si Binay nga haka-haka kay adunay mga ebidensiyang gisang-at sa mga whistleblowers didto sa Ombudsman.

Gisakmit ni Senador Grace Poe ang pasikat gamit ang kampanya sa ilegal nga drugas. Daan na nga giduso ni Davao Mayor Digong Duterte ang ideya nga ang ilegal nga drugas angay ideklarar nga “threat to national security” kun hulga sa nasudnong seguridad.

Apan karong bag-o, si Poe ang miduso nga himuong cabinet-level ang ahensiya nga modumala sa kampanya aron hasta na ang Armadong Kusog sa Pilipinas paapilon na sa mga operasyon batok drugas.

Dili ko mopakpak ni Poe kay igo ra gyud siyang nanghuwam sa ideya ni Duterte. Mosakay gyud si Poe niining isyuha kay ang gisikatan ni Duterte mao ang iyang pagbalikbalik nga sulod sa tulo ngadto sa unom ka bulan kun siya’y ma-presidente, pulpogon niya ang drugas sa nasud.

Kay wala man gyu’y isyu nga makit-an ang oposisyon, gipugos gyud nila og banhaw ang Mamasapano sa Senado pinaagi nilang Senador Juan Ponce Enrile ug Poe. Apan bisan unsaon nila og bira si Presidente Noynoy Aquino sa pagtuong mabira si Mar Roxas, wala man hinuoy epekto sa iyang survey rating. Sa mga survey, samtang ang uban mipilit, nagsaka ang iyang rating.

    * * *

Bisan gisaway na sa media ug sa Facebook silang Mayor Jonas Cortes ug Kongresista Luigi Quisumbing tungod sa ilang wala’y ulaw nga pagpamilit og tarpaulin sa ilang line-up alang sa eleksyon unya sa Mayo 9, wala gihapon nila kini panangtanga sa mga proyekto sa gobiyerno sama sa skywalk ug waiting shed.

Ambot og nakasabot ba unsa’y meaning sa “epal” silang Jonas ug Luigi. Nganong epal? Kay ang mga tarpaulin nga adunay dagko kaayong hulagway nilang Jonas, Luigi ug mga kandidato pagka-konsehal sa Mandaue, anaa man sa mga skywalk ug waiting shed nga gigastohan sa buhis sa katawhan.

Dili usab ko motuo nga wala sila’y kalibutan niini tungod kay ang gipanggamit nga sakyanan sa mga tawong nangmuntar iya man sa Barangay Guizo.

Maayong pukawon ang atensiyon sa Ombudsman ug Comelec ning kalaki nilang Jonas ug Luigi.