Kuyaw gamiton

Dili kini pagdugang sa tensyon tali sa Pilipinas ug China sa kasamtangang kasungian niini kabahin sa pag-ilog sa mga Insik sa atong teritoryo diha sa Spratly Islands.

Apan tukma lang siguro nga akong tukion ang nagkadaghan nga insidente sa sunog diin ang hinungdan mao ang mga substandard nga electrical appliances ug mga charger nga ginama sa China.

Base sa datos nga atong nakuha, ang mga substandard series lights, ceiling fan, charger ug gani TV nga “Made in China” maoy hinungdan sa mga sunog nga gitubag sa atong kabomberohan bag-ohay lang.

Ang inyong kabomberohan mohangyo sa publiko nga likayan unta  ang pagpalit ug paggamit niining mga substandard nga electrical appliances kay dako kaayo kini nga risgo sa sunog.

Nakabantay ba kamo, labi na kadtong mga nakasulay na og palit niining mga substandard nga appliances nga dali ra man kining maguba ug ingon sa disposable?

Ang rason mao nga pwerte ka pino sa wire kon alambre nga gipanggamit niini, ug posibleng dali malanay sa tanto nato nga paggamit, ilabi na kun gamiton og dugay. Barato apan ang kalidad dili garantisado. Mas maayo siguro nga kun mopalit man gani kita og kahimanan, kadto na lang mga brand nga kasaligan nato, bahala na lang og mas mahal ang presyo.

Unsaon man ang barato unya delikado. Kadtong sunog nga giingong miulbo sa Sitio Fatima sa Barangay Apas, giingon nga naggumikan sa charger sa cellphone nga buhat sa China.

* * *

Sa pikas bahin, ugma na ang kataposang adlaw sa 51st International Eucharistic Congress nga gipahigayon dinhi sa dakbayan sa Sugbo. Taposon kini pinaagi sa usa ka santos nga misa ug gipaabot nga tambongan kini og dili momenos usa ka milyon ka tawo.

Kadtong buot motambong, kun biyaan ninyo ang inyong balay siguroa pag-ibot ang nakasaksak ninyo nga dekuryenteng appliances, isirado ang LPG regulator ug mas maayong palongon ang breaker. Unta walay kakulian atol sa pagtapos sa 51st  IEC.