EDITORYAL - Maleksyon sa Mamasapano la
Wala gyud kalikayi nga adunay misalida sa gibuksan pagbalik nga Mamasapano probe diha sa Senado kagahapon dihang gikutikuti ni Senador Juan Ponce Enrile si kanhi interior secretary Mar Roxas.
Nahimong sentro sa mga pangutana ni Enrile kun nganong wala masayod si Roxas sa operasyon sa Special Action Force nga niresulta sa kamatayon sa 44 ka mga sakop niini didto sa Tukanalipao, Mamasapano sa probinsya sa Maguindanao.
Isip interior secretary kansang departamento maoy dunay kontrol sa Philippine National Police angay gyud unta nga aduna siyay kasayuran sa gipanghimo sa iyang mga sakop. Apan kung nasayod ba kaha si Roxas sa maong operasyon mapugngan ba niya ang kamatayon sa maong mga polis?
Ang angay nga sentrohon sa mga pangutana kining mga opisyal sa PNP-SAF ug sa local AFP commanders aron makita kun kinsa kanila ang angay nga manubag sa kamatayon sa mga polis.
Sayo-sayo sa nagpadayong hearing kagahapon, ang mga opisyal sa Armed Forces of the Philippines miinsister nga daghang mga operational lapses ang PNP-SAF.
Kini sama sa kakulang sa koordinasyon, wala magkatakdo nilang gigamit nga radyo sa AFP ug SAF, di parehas og mapa, way klaro kun asa ang eksakto nilang posisyon ug posisyon sa mga kaaway, duna pay alegasyon nga nagduha-duha ang tulo ka SAF company commanders pagsud sa dapit diin napiit ang 55th Special Action Company ug uban pa.
Kun tan-awon og maayo ang dagan sa hearing kagahapon, daw nagpinahiray og basol ang PNP-SAF ug ang AFP nganong nahitabo kini.
Maayo unta kun ang mga impormasyon nga giwadwad sa mga imbitadong opisyal diha sa hearing, makahimo og mga kausaban ang PNP ug AFP aron mas mapalambo pa nila ang ilang operasyon ug di na mausab ang ingon ini nga trahedya.
- Latest
