EDITORYAL – Palpak ang kapitan

Sa dayon na nga pag-asumer sa mga pinili nga opisyal sa ilang katungdanan, manumpa gayud sila nga tumanon ug ipatuman nila ang balaod diha sa tagsa-tagsa nila ka teritoryo.

Apan subo lang kaayo palandungon tungod kay adunay mga pinili nga opisyal, ilabi na ang mga opisyal sa barangay, nga kutob ra sa ilang dila ang panaad.

Mao kini ang nahitabo ni Kapitan Joel Sable diha sa Barangay Suba ning dakbayan sa Sugbo nga wala gani makapitol sa kalihukan sa iyang anak nga maoy nagpadagan sa ilegal nga sugal sa iyang barangay.

Gironda sa kapolisan ug nadakpan ang anak sa kapitan ug nasakmitan og kahimanan sa pag-operate og masiao swertres. May report pa nga ang maong anak sa kapitan nalambigit pa sa laing ilegal nga kalihukan.

Isip kapitan sa barangay, angay gyud unta nga si Kapitan Sable mohimo, kutob sa iyang mahimo, aron mapitol ang dili maayong binuhatan sa iyang anak.

Kay gipanumpaan man niya nga ipatuman gyud niya ang balaod, angay nga ipabilanggo ni Kapitan Sable ang iyang anak kun dili man gayud kini motuman kaniya sa paghunong sa ilegal nga kalihukan.

Adunay panultihon nga “Dura Lex Sed Lex” nga kun hubaron nimo sa binisaya nagpasabot nga sakit gyud tinuod ang balaod, apan wala kita’y mahimo tungod kay mao man kini ang gimbut-an sa balaod?

Salikwaot kaayo alang kang Kapitan Sable nga magngisi-ngisi nga moduol sa mayor nga iyang kaalyado apan wala siya makatuman sa gitahas kaniya sa balaod.

Lain kining kapitan nga kaalyado sa administrasyon nga wala makapitol sa ilegal nga kalihukan sa iyang teritoryo ug naghatag og dakong tamparos ni Mayor Michael Rama.