Gubat sa kakabos
Labihang lisora nga tubagon sa dugay na kaayong hagit sa pagsulbad sa kakabos ug kagutom nga gipalabi na lang sa mga hingtungdan ang pagbungul-bungol. Labing kusganong tingog nga nidason sa kalibotanong awhag karong bag-o mao si Pope Francis. Kansang mensahe pagpaduol sa Simbahang Katoliko ngadto sa labing kabos aron sa pag-alagad sa labing batakan nilang panginahanglan gipasabot bisan sa labing unang adlaw sa iyang pamunoan.
Samang mensahe ang gisangyaw sa iyang representante nga si Cardinal Charles Maung Bo, ang Arsobispo sa Myanmar, nga maoy niduma sa Santos nga Misa nga gitambongan sa dul-an sa tunga ka milyon ka Katoliko sa pagbukas sa 51st International Eucharistic Congress (IEC) sa Plaza Independencia sa Dakbayan sa Sugbo.
* * *
Apan bisan sa pag-insistir ni Kardinal Bo nga ang Santos nga Misa, nga maoy sentro sa kalibotanong tigom, di mahimong buwagon gikan sa kakabos, way madasigon nga nidason sa mensahe nilang Pope Francis sa unang adlaw sa mga sesyon sa IEC Pavilion.
Nawani ang awhag ni Kardinal Bo sa paglusad sa ikatulong gubat sa kalibotan batok sa kakabos ug inhustisya sa paghatag sa ubang mga haligi sa simbahan og mas dakong importansiya sa kapiyestahan sa pagkausab ni St. Paul gikan sa pagka-berdugo nga bangis nga nilutos sa mga sumosunod ni Hesukristo ngadto sa ilang labing kusganon nga tigpanalipod.
* * *
Ambot tungod ba kaha sa kalapad sa suliran nga maglisod sila asa ug unsaon pagsugod pagtabang ang mga kabos ug mga gipanggutom, ang nagkalainlaing sektor nga naglakip sa ubang kaparian nipili sa paglingiw. Aron nga mahapuhap ang ilang tanlag aron paglikay nga mahasol sa ilang pagpangiyugpos, nidangop sila sa duha ka panagang:
Una, mirisi ang mga kabos kay mga tapolan ug wa maningkamot paghaw-as sa ilang kaugalingon gikan sa katimawa; ug
Ikaduha, mirisi ang mga kabos kay iresponsable sila nga nipaburot sa ilang mga pamilya bisan di na kabuhi sa nanguhong nila nga mga anak ug di nang kahatag nila bisan pagkaon ug pinuy-anan.
* * *
Apan samtang tinuod nga may mga kabos nga tapolan ug iresponsable, di silang tanan ang matulisok sa pait nilang kahimtang. Kasagaran sa mga kabos di tapolan ni iresponsable apan gihikawan lang sa tanang kahigayonan sa pagpalambo sa ilang kahimtang.
Unsa may mahimo sa kabos nga mga mag-uuma nga gipalayas sa ilang mga umahan nga nailog sa mga negosyante nga nipalusot sa ilang subdivisions. O sa mga kabos nga taga dakbayan nga gipanangtang sa trabaho tungod sa pagbarug sa ilang katungod? Unsa man intawoy ilang dag-anan kun mangahas pagsukol sa mga nagtungkawo sa gahom? Maayong sinugdanan ang pagtabang og usa ka kabos. Apan kay minilyon man sila ug nagbuntaog mang ilang mga panginahanglan, mas sayon ang paglingiw ug pagpabungul-bungol.
- Latest
