Auriculo therapy (3)

Kining 'auriculo therapy' sayon sundogon kun imong tan-awon ang gihimo, apan lisud kini buhaton. Kay adunay nagpahipi nga kontrobersya, nga angay matngonan, aron kini moepekto sa pag-ayo. Sama pananglitan, kun depektoso ang imong atay o ang 'gallbladder', sa tuo nga dalunggan ra kini i-'auriculo'.

Nindot kaayo pamation samtang gi-therapy ka ini, mabati mo ang inanay nga kausaban sa imong mga gipamatyag. Di lang kini pagrelaks sa lawas kundi hingpiton sab niini nga ayuhon ang katibuk-ang mga sistima sa lawas aron sa pagbaton nga ibalik sa normal ang kahimsog sa panglawas.

Sa mga eksperto na niini'ng 'auriculo', kun magtan-aw sila sa dalunggan, mora ni'g may mga nakaguhit nga hulagway sa mapa. Nakaplastar ang mga 'auricular reflex' o 'meridians/acu-points', nga nagpundok sa siot natong dalunggan. Nga kini nagrepresentar sa katibuk-ang bahin sa atong lawas nga kun duna'y palyado, anhi lang buhaton ang mga gikinahanglan nga remedyo sa pag-alibyo, sama sa acupresyor, acupuncture, earseeds ug uban pa.

Ang 'auriculo therapy', usa ni sa aspeto sa epektibong tradisyonal nga panambal, nga epektibo dili lang sa pag-alibyo nga wagtangon ang sintomas sa sakit, kun dili hasta ang katibuk-ang hinungdan sa pagkasakit niini ayuhon sab. Ilabi na'g gamita'g 'ear acupuncture' o tusloka'g dagom, ighuman butangan dayon og 'earseeds' nga ipapilit sa may apektadong 'acu-points' sa dalunggan.

Ang nakanindot sa 'auriculo', gawas nga maka-'diagnose' kun unsay sakit , aduna pa gyu'y tan-awon sa imong dila ug sa nawong nimo, aron sa pag-analisar o makompirmar, nga may sakit ka gyud ini, segun sa imong mga gipamati.

Sa mga spa, diin sagad nagserbisyo sa masahe nga pamparelaks lang sa kalapoy sa lawas, angay nga unta kini iapil apan wala pa gayud kini mauso.