Rebenta sa pulitika

Mahimong leksiyon ngadto sa mga pulitiko ang nahitabo nga pag-boo sa audience ni Bise Presidente Jejomar Binay didto sulod sa Cebu City Sports Center atol sa tinuig nga Sinulog Festival sa nakalabay nga Domingo. 

Daan nang gipahibalo sa mga organizer sa Sinulog nga tungod lagi kay panahon karon sa eleksiyon, wala’y usa ka pulitiko ang tugotan nga motindog ug modiskurso atubangan sa audience sulod sa sports complex.

Sa laktod nga pagka-estorya, gidili gayud alang sa mga kandidato ang pagpangampanya didto sa grandstand. Ang maong palisiya naglangkob usab sa pagdili kanila pagbaktas sa parade route pagsiyagit sa ilang mga plataporma.

Hagbay ra kini nga palisiya, ilabi na kong nagkaduol na ang piniliay. Kini aron lagi paglikay nga masagolan og lama sa pulitika ang sagradong kalihokan nga gipahinungod sa mga Sugbuanon kang Señor Sto. Niño. 

Apan atol sa niagi nga Sinulog, naputol ang pisi nga nagbugkos sa mao nga palisiya. Sa human niyang diskurso, midiretso dayon si Mayor Michael Rama pag-anunsiyo sa audience sa presensiya ni Binay.

Apan sa dihang mi-greet ang bise presidente sa audience, kalit lamang kuno siya nga gi-boo sa katawhan. Mao siguro kadto ang hinungdan nga daling nakauli sa mikropono si Binay kay lisod nang modiskurso pa siya.

Sa akong tan-aw, sipyat si Rama niadtong tungora. Ambot ngano nga iya pang gi-introduce si Binay sa audience. Nakahibalo man unta ang mayor nga dili gayud angay nga mo-starring sa entablado ang mga kandidato niadtong tungora.

Ug ngano usab nga gitugotan sa mga organizers nga makasaka sa stage ang bise presidente ug uban niyang kandidato sa UNA?

Tungod ba kaha kay dili sila kaako pagpugong kanila gumikan lagi kay kapartido sa mayor?

Tungod sa maong insidente, nabati na hinuon ang paglantaw sa kalibotan sa mga Sugbuanon. Siguro daghan ang nakaingon nga daghan sa mga Sugbuanon ang walay respito sa atong mga opisyal sa nasud.

Apan kun si kinsa man ugaling kadtong nang-boo ni Binay – mga Sugbuanon ba o mga bisita – klaro nga bunga kadto sa kultura sa mga Pilipino nga naanad morebenta basta sagulan na gani og pulitika ang relihiyon.