Arogante ug walay tahod!

Kini ang balos sa traffic enforcer ngadto sa batan-on nga babaye nga mipakaulaw kaniya. Apas-sumpay kini sa akong lindog niadtong Miyerkules nga giulohan og "kuya bungol ka?"

Si Bonifacio Legarde, 54-anyos nga sakop sa Cebu City Transportation Office, mitubag na sa pasangil kaniya sa batan-on nga babaye nga iyang gikalalis niadtong Enero 15. Ang komprontasyon nakuhaan og video ug nag-viral sa Facebook.

Gipanghimakak ni Legarde ang pasangil nga wala siya’y tinguha pagtabang sa tigulang nga babaye nga buot patabangan niadtong batan-on nga iyang gikalalis.

May nahauna pa nga nangayo niya’g tabang, usa ka paralisado nga tigulang lalaki nga naka-wheelchair aron usab makasakay og taxi. Iyang gipasabot ang tiguwang babaye nga isunod niya kini pagtabang.

Nagtuo ang traffic enforcer nga gi-set up siya sa grupo sa mga batan-ong babaye aron masuko ug makuhaan og video dayon i-upload sa social media aron maulawan.

Gipadayag ni Legarde nga tinarong ang iyang pagserbisyo isip traffic enforcer ug dili siya moabot og 28 ka tuig sa trabaho kun bati pa siya og batasan. Gisuportahan si Legarde sa iyang mga opisyal.

Matud ni Legarde nga wala niya igsapayan ang nasinati nga ulan ug init, diin matud niya, usahay mokurog na ang iyang tuhod sa pagbinarug aron lang makahimo sa iyang tahas, busa gisakitan kaayo siya sa pasangil nga nakamugna og dako nga kaulawan sa iyang pamilya.

Punto sa enforcer nga kun adunay pagbati ang batan-ong babaye ngadto sa mga tigulang, ngano nga wala man kini morespeto kaniya isip usa usab ka edaran na.

Gawas pa, ngano nga dili na man lang sila ang mangita og taxi nga ka pasakyan sa tigulang kun tinuod nga nagpakabana kini sa tiguwang?

Hinumdumi nga ang trabaho sa mga traffic enforcer mao ang paghapsay sa trapiko. Bonus na lang ang pag-atiman sa mga nanginahanglan isip moral obligation nila.

Alang sa mga batan-on, angayan nila isilsil sa alimpatakan ang respeto, ilabi na sa mga edaran na. Samtang alang sa mga nagserbisyo angayan usab nga inaton ang pasensya ug dili magpadala sa emotion kay segurado nga ikaw ang mogawas nga kontrabida