IEC sa Sugbo

Unsa na lang ka bulahan ang Sugbo sa pagsugod sa Tuig sa Kalooy!  Sunod-sunod ang mga relihiyosong kalihukan sa Sugbo sa pagbukas sa tuig 2016.

Ang 2016 gideklarar ni Pope Francis nga Year of Mercy, kon Tuig sa Kalooy. Opisyal nga nagsugod ang Year of Mercy niadtong December 8, 2015 atol sa kapistahan sa Inmaculada Concepcion, kon ang putli nga pagsamkon ni Santa Ana sa iyang anak nga si Birhen Maria aron mahimong takus nga inahan ni Kristo, kang kansang kapistahan sa iyang pagkabata gisaulog sa Sugbo matag ikatulong Domingo matag buwan sa Enero.

Sa pagbukas sa 2016, linga ang Sugbo sa pagpangandam sa daghang relihiyosong kalihukan. Una ang kapistahan ni Señor Santo Niño niadtong Domingo.

Minilyon ka deboto ang nitambong sa mga misa nga gipahigayon sa adlaw sa kapistahan sa Balaang Bata. Tagsa-tagsa kanila nagbawon sa ilang mga pangilaba alang sa kalooy sa Milagrosong Bata.

Apan wala pa hingpit matapos ang kapistahan tungod kay ugma pa kini mapupos. Ang seremonyas sa "Hubo," kon ang pag-ilis og bag-ong senina sa Balaang Bata, maoy pormal nga motak-op sa iyang kapistahan.

* * *

Sulod sab niining semanaha nagsugod na ang mga pasiunang kalihukan alang sa International Eucharistic Congress nga sa labing unang higayon ang Sugbo maoy host sa kalibotanong kalihukan sa Simbahang Katoliko. Sa Domingo pa pormal nga buksan ang dagkong panagtigom sa IEC.

Pipila sa mga kalihukan nga gipasignunot sa IEC mao ang pagpahigayon sa mga tigum sa Catholic Bishops Conference of the Philippines (CBCP). Kun wala ko masayop, kini ang labing unang higayon nga maka-host usab ang Sugbo sa mga tigum sa CBCP nga kuli kaayong mahitabo kun wala pay IEC.

Gipahibawo sa Executive Secretary sa Communications Department sa IEC, Monsignor Joseph Tan, nga sa Biyernes dunay santos nga misa nga ipahigayon sa Cebu Metropolitan Cathedral alang sa oath-taking sa bag-ong mga sakop sa CBCP.

Lakip sa mga manumpa mao ang duha ka bag-ong obispo ug auxiliary bishops sa Archdiocese sa Sugbo nga sila si Bishop Dennis Villarojo ug Bishop Oscar Jaime Florencio. Ang maong okasyon mao ra ang tugtan sa CBCP nga tambongan sa publiko ug mga sakop sa media sa ilang mga kalihukan dinhi sa Sugbo. Usa ka kasaligan nga tinubdan sa simbahang katoliko nipasabot nga dili buot ang CBCP nga ipa-cover sa media ang ilang mga tigum aron dili mabalhin ang atensyon sa media gikan sa mga kalihukan sa IEC.

Hinoon mopagawas sila og press release sa ila unya nga natuki ug nasabotan sa dayon na nga tapos sa kalihukan sa IEC. Alang sa mga gusto nga motambong sa ubang kalihukan sa IEC nga wala magkinahanglan og ID o registration mao ang santos nga misa nga ipahigayon sa Enero 24, alas kuwatro sa hapon, anha sa Plaza Independencia sa pagbukas sa IEC 2016.

Sa pagka Enero 29, alas kuwatro sa hapon, may laing misa anha sa Cebu Provincial Capitol grounds. Human sa misa mag-procession paingon sa Plaza Independencia alang sa benediction. Sa Enero 31 may misa usab nga ipahigayon sa templete ni San Pedro Calungsod sa South Road Properties sa pagtak-op na sa kalihukan sa IEC.