Votes ni Roxas minus SSS pensioners

Tungod kay wa man kaabot og 10 years ang akong pag-alagad sa gobiyerno human gi-abolish ni kanhi Presidente Cory Aquino ang among departamento nga mao ang Office of Media Affairs, wa ko mo-qualify sa pension plan sa Government Service Insurance System (GSIS).

Gi-abolish ni Cory ang OMA tungod sa iyang kasuko ni kanhi Presidente Marcos ug gi-abolish sab ang Ministry of Human Settlement tungod sa iyang kasuko ni Imelda, ang asawa ni Marcos.

Ambot ngano nga giinitan mi ni Cory?  Wa lang hinoon ko maka-eskuwela sa DAP (dili DAP ni Noynoy), kun dili, Development Academy of the Philippines.

Anyway, maayo man gani kay nakatrabaho ko sa usa ka pribado nga kompaniya ug usa ako karon sa mga SSS pensioner nga nag-antos sa kagamay sa pension.

Maoy hinungdan nga daku ang among kalipay diha nga ang Kongreso mipasar og balaudnon pag-increase og P2,000 (across the board) sa pension sa tanang SSS pensioner.

Apan, wala malipay ang anak ni Cory niini busa wala niya kini pirmahi. Wa mi magdahom nga ihikaw sa presidente ang usbaw alang sa among pension. Makamugna kini og solid SSS pensioners’ votes batok ni Roxas. Daang Matuwid?

Kinsa kaha sa mga pilionon karon pagka-presidente ang  mopasalig pagbanhaw ug pag-approve niining maong balaudnon? Unsa may gibasehan ni Noynoy sa iyang pag-ingon nga mabangkarota ang gobiyerno kun usbawan ang madawat sa mga SSS pensioners?

Ug just in case, wala kabasa si Noynoy sa RA 9257 of 2003 nga giamendar sa RA 9994, kon Expanded Senior Citizens Act of 2010, ania atong kutloon:

Rule V, Art. 11, Sec. 6, giulohan Benefits and Privileges for Retirees. “To the extent practicable and feasible, the senior citizens shall be granted the continuance of the same benefits and privileges given by the Government Service Insurance System (GSIS), and Social Security System (SSS) and PAG-IBIG, as the case may be, as enjoyed by those in active service.” Natuman ba ni, Noy?

Padayon: “Retirement benefits of retirees from both the government and the private sector shall be regularly reviewed every year to ensure their continuing responsiveness and sustainability, and to the extent practicable and feasible, shall be upgraded to be at par with the current scale enjoyed by those in actual service.”

Since 2003, kapila mag-upgrade ang SSS ug GSIS sa ilang pension, nga yearly man unta ang ilang pag-review? Sa akong nahinumdoman, since 2003, or since 2010,  karon pa unta mi makatilaw og increase, kun naluoy pa si Noynoy namo. Sayang ang SSS pensioners’ votes alang unta ni Mar Roxas.