SSS gipamolitika

Gisakyan sa mga oportunista ug mga trapo nga politiko ang isyu sa umento sa pension sa mga sakop sa Social Security System.

Ila kining gihimo aron maguba ang dako nga pagsalig sa katawhan ngadto ni Presidente Noynoy Aquino.

Sayod kita nga ang tumong niining mga tawhana dili lang ang presidente, kun dili, apil na usab ang gusto niya nga papulihon sa iyang katungdanan nga si kanhi DILG Secretary Mar Roxas.

Kining tanan, timailhan nga gikahadlokan sa iyang mga kaatbang sa politika si Mar Roxas ug dili tinuod ang ilang giingon nga mamonbon si Roxas sa pag-abot sa eleksyon.

Timailhan nga bakak ang ilang giingon nga “halok sa kamatayon” ang pagduso ug pagtuboy ni Presidente Aquino sa kamot ni Mar Roxas aron maoy mosunod kaniya sa Malakanyang.

Isip sakop sa SSS, mituo ko ni Presidente Aquino nga tinuod gayud ang iyang gibasehan sa wala niya pagpirma sa balaudnon nga naghatag og dugang duha ka libo ka pesos sa pension sa mga pensionado.

Una, kinsa may presidente nga dili mopirma og balaudnon nga maghatag og kaayohan sa iyang katawhan? Ikaduha, dako kini og epekto sa gituboy niya nga mga kandidato sa nagsingabot nga eleksyon.

Ang mga kontra sa pangulo mura’g mga hayena nga nagnga-nga ug nagkatawa sa ilang gihimo tungod kay sayod sila nga ilang gisulod sa laang ang pangulo pero nakalighot kini.

Ilang gibutang ang pangulo sa sinaryo nga mao kini ang mabasol sa maski unsa man niyang hukom sa SSS pension. Nga kun dili siya mopirma niini, siya ang basulon ug kaaligutgotan sa mga pensionado tungod sa pagka walay pagbati sa ilang kahimtang.

Kun iya pud kini nga pirmahan, siya usab gihapon ang basulon sa mga pensionado kun ugaling mabangkarota ang SSS. Hahay politika.