Mangu ug mangi are coming

Sila ang mga unwanted visitors nga maki-celebrate sa Sinulog Festival, ang mga mangunguot ug mangingilad nga nagpahipi na sa mga kilid-kilid ug nagpaabot nga makahigayon sa pagpangigo sa ilang mga target nga biktimahonon.

Dungan sa pagdagsa sa daghang tawo, apil na ang mga turista ug balikbayan nga maghugop ug mopuno sa kadalanan sa dakbayan aron moapil sa kasadya. Apan gidahom nang daan nga mosagol usab ang mga badlongon nga mopahimulos sa higayon.

Kining grupo sa mga kriminal gikan pa sa laing lugar. Hinuon hapsay ra man ang penitential walk with Jesus sa niagi nga semana. Ang Walk with Mary gipahigayon usab kaganinang kaadlawon nga gisalmotan sa liboan ka deboto.

Apan gilauman nga mas modagsa pa ang baga nga duot sa katawhan atol sa solemn foot procession ugma sa hapon ug mosamot pa gyud sa Sinulog Grand Parade karong Domingo. Mopakatap ang kapolisan og mga 3,500 ka polis nga maoy motutok sa seguridad ug abagan usab sila sa kasundalohan nga mao ang bahala sa crowd control.

Apan bisan pa sa kahugot sa seguridad, posible pa gihapon nga makalusot ang mga dautan nga elemento sama sa mga kawatan tungod kay ang mga otoridad ra man usab ang ilang bantayan nga malipat ug dayon mohimo sila og krimen.

Maayo lang unta kun sila lang "mangu ug mangi" ang moapil sa selebrasyon, unsaon na lang kun may labaw pa sa kadautan kanila nga moapil sab, sama ni "Tero-Rista", pagka delikado.

Hinuon, gipatin-aw sa PRO-7 nga wala sila’y nadawat nga hulga sa terorismo apan bisan pa niini ila usab kining gipangandaman.

Alang sa mga ordinaryo nga sibilyan dili lang nato isalig ang tanan  ngadto sa mga otoridad, kun dili, kita mismo motabang sa pagsiguro sa atong kaluwasan.      

Makig-alayon kita sa mga otoridad kun may nasigpatan kamo nga hulga sa kahapsay ug kalinaw, unya dili magsul-ob og mga mahalon nga butang nga nagdala og "come here" sa mga kawatan.

Ang "best protector" dili ang mga otoridad, kun dili, kita mismo ang makaluwas sa atong kabtangan ug labaw sa tanan sa atong kinabuhi.

Sinulog isyagit ug kusog...amping lang gyud!