Ayaw ibaligya aron mahalin

Usahay maminghoy kita sa kaluya, ilabi na nga kita may gibaligya apan wala gyu'y nasipong nga halin. Magkalisod, makatapal o maalkanse sa inadlaw nga wala'y madegamong kita. Dili ni basta nga buhat kay nagkinahanglan kini og seryoso nga pagtuon sa abilidad nga ikaw makahalin gayud sa imong baligya.

Sa pamaligya, aduna ni paagi o stratehiya, nga angay natong makat-onan, ilabi na mao na'y himuon mong linya, aron ikaw mokita. Kun mamaligya kang mosuroy nga manghagad sa baligya mo, dili ka gayud mahalinan. Kay sagad sa reaksyon sa imong baligyaan, diha-diha mobalibad gayud dayon.

Kay ngano man?  Musantop man gud sa ilang hunahuna ang mga negatibong rason, sama sa kamatinud-anon sa pagbaligya ug sa namaligya. Ang produkto o serbisyo, nga bisan iya kining gikinahanglan, di gyud dayon kini nimo makombinsi nga mopalit. Unsa man diay ang angay nato nga buhaton?

Kun buot ka gayud mahalinan, ayaw ibaligya ang imong produkto o kaha ang gihangyag mo nga serbisyo. Mao'y iseguro nga ang tawong giplanohan mong baligyaan, mao ang imong kaugalingon nga makombinsi mo sila nga ikaw masaligan sa imong pagbaligya. Bisan wa kini maghunahuna nga mopalit, mapugos kini nga mokuot sa kaikog tungod sa kamaayo mong modiskarte.

Kinahanglan nga ipukos ang kalidad sa imong pagkatawo, nga kuhaon mo ang pagsalig sa mamalitay, di lang sa usa kahigayon nga ikaw kahalinan. Ipakita ang lubos nga pangalagad kaniya bisan siya nakapalit na kanimo. Padayon ang maayong relasyon sa imong mga suki, kutob mahimo himoa nga siya makontento sa produkto o sa serbisyo nimo. Aron himoon kang kadangpan sa uban pa niyang mga panginahanglan. Sa laktod, mahimo kana'ng kasaligan nila.

Sa ingon ini, mahanas ka's pamaligya nga di kana maproblema sa paghalin.