Si ma’am ug ang drugas

Nasikop sa gipahigayon nga buy-bust operation sa lungsod sa San Francisco sa isla sa Camotes ang magtutudlo, iyang bana ug tulo ka anak.

Nakuhaan sila og shabu nga mobalor og subra P2 milyones. Gawas niini, nakuhaan usab ang mga nadakpan og tag-as nga kalibre sa armas.

Ang mga nadakpan mao sila si Ma. Jocelyn Arquillano, usa ka magtutudlo ug ang iyang bana nga si Diosdado, ingon man ang tulo nila ka anak nga pulos anaa na sa husto nga panuigon.

Si Diosdado gikan na sa prisohan tungod gihapon sa kaso nga naglambigit sa gidiling drugas.

Si ma’am nag-leave sa iyang pagka magtutudlo kay gusto niya nga makauban ang iyang bana apan ang ilang panag-uban dili na sa ilang pinuy-anan, kun dili, adto na sa prisohan.

Ingnon ko lang dinhi nga wala moapil si ma’am sa pagpamaligya og shabu ug nadamay lang siya sa binuhatan sa iyang bana nga tigpayuhotan og gidiling drugas.

Pero siyaro, wa gyud siya makatambag sa iyang bana? Ang ilang negosyo milahutay tungod kay wala boyaga ni ma’am ang iyang bana seguro kay giganahan ra pud siya sa dakong kita sa gidili nga negosyo.

Nalimot si ma’am sa dakong responsibilidad nga nakapatong sa iyang abaga tungod kay nasilawan siya sa dako nga kita sa negosyo sa ilegal nga drugas.

* * *

Ako diay nga i-greet og happy birthday ang akong hamiling kapikas nga nagsaulog sa iyang adlaw nga natawhan karong adlawa. Hatagan ka pa unta og daghan pa nga katuigan sa imong kinabuhi. Happy birthday, love!