Ang polusyon sa ubang lugar (2)

Gusto ba kita nga maputos sa polusyon o mapuno sa kahugaw ang atong lugar, aron kita ra sab ang mag-antos sa dautang epekto ini sa atong panglawas ug unya maapil kita sa labing alaut nga nasud kay grabe kita kahugawan nga gilumloman na sa polusyon, tungod sa ka wa'y disiplina sa kalimpyo sa palibot.

Ania pa ang mga lugar nga nabaniog na sa grabeng polusyon, unta mahimo kining leksyon nga di ingon ini kagrabe dinhi sa atoa, sama sa ubang lugar.

* La Oroya, Peru — Kining lugara mao'y tunawanan (smelting area) sa mga 'lead metal', nga gipadagan sa North American Company - Doe Run. Kini mao'y nakaamong o hinungdan sa grabeng polusyon didto'ng lugara. Maingon man sa kasilinganang dapit. Sagad sa mga tawo didto, ilabi na ang kabataan, ang lawas aduna'y daghang 'lead metal' nga makadaut sa kahimsog sa panglawas.

* Lake Karachay, Russia — Tam-okanan kini nga lugar, diin mga hugaw o wala na magamit sa mga planta sa nuclear didto, mao'y nakagrabe sa polusyon. Mosuroy ka lang og usa ka oras ning lugara, mura'g magnet nga grabe na ang toksik mosud sa lawas mo. Ang mga trabahador didtong dapita, halos tanan may gihambing  kanser sa panglawas.

Sagad sab sila may sakit sa anemia, o depektoso sa tagoangkan o pagpanganak (freak). Taas ang 'radio activity' o 'radiaton' kining dapita bisan sa mga kasikbit niining lugara.

* Space (kawanangan) — Ang mga tawo sab nga nalambigit sa eksplorasyon sa kawanangan, daghan sab og kabilin sa mga hugaw o mga basura o mga sakyanan nga mga gubaong wala na magamit, nga nag-lutaw-lutaw na lang sa kawanangan. Duna'y posibilidad nga mahigop kini sa kalibutan.

Pipila lang ni sa mga lugar nga gianinaw nato, nga gilikopan na sa polusyon. Busa magtinabangay kita nga patunhayon ang kalimpyo kanunay sa palibot.