Kalooy ug kaaghop

Dili kini sa dunggan, kun dili, sa dughan.

Hilabihan ka lingaw sa mga tawo nga nanimba sa Basilica del Sto. Niño niadtong Domingo sa hapon, ika upat nga misa nobenaryo alang sa kapistahan sa Balaang Bata.

Kini tungod sa homily sa pari nga naghalad sa santos nga misa niadtong orasa nga bisan og taas ang iyang sermon apan dili puol paminawon sanglit gisagolan man niya og pagpakatawa hinungdan nga ang mga nanambong wala gyud batia og duka.

Ang komedya sa pari dili mabaw, sanglit gibase man niya sa tinuod nga kasinatian nga kasagaran gyud mahitabo sa kinabuhi sa tawo.

Gipanghimug-atan sa pari ang "mercy and compassion" nga kanunay nga gitisok ni Pope Francis nga ipatigbabaw sa mga magtotoo. Sa ato pa, kinahanglan nga ipakita ang kalooy ug gugma sa usa’g usa, ilabi na kadtong mas nagkinahanglan.

Dihang gipangutana sa pari ang mga nanimba kun gihimo ba kini nila, dali sila nga nakatubag ug nagkanayon "o padre." Apan dihang miingon ang pari nga ang mga batan-on o kadtong mga lig-on pa og tuhod nga naglingkod mobarug ug ihatag ang ilang mga lingkoranan ngadto sa mga tigulang, nikalit og kahilom ug wala gyuy bisan usa ang mikihol o misanong sa hagit sa pari.

Bisan og gipaagi sa pasiaw sa pari ang naasoy’ng awhag apan dala kadto tinuod. Lain pa nga nabantayan ang paglinya panahon sa pagpangalawat nga maglumbaanay kinsa ang makauna ug dili gyud mohatag og lugar sa uban nga maka-insert sa linya kay ipatigbabaw gyud dayon ang "first come first serve," unsa tindahan?

Pastilan asa na man ang mercy and compassion niini?

Sayon kaayo kini litokon apan lisod buhaton nga bisan gani sa sulod sa templo sa Ginoo dili man mahimo sa uban nga mga tawo. Ablihan kuno nato dili lang ang atong mga mata ug dunggan, kun dili, labaw sa tanan ang atong dughan aron ato nga mabati ang hagawhaw sa kasing-kasing diin naggikan ang kalooy ug kaaghop sa ato nga isig ka tawo.

Samtang kun ingon lang usab niadto ka hait mohatag og sermon ang pari segurado gyud nga modulot ang pagtulon-an ngadto sa kahiladman.