Brgy Luray, Toledo City
“Kining akong reklamo bahin ni sa imburnal nga gihimong labayanan sa mga basura sa ubang mga tawo unya kun mag-uwan dili kalahos ang tubig kay sirado na ang imburnal ug ari na padung sa among mga balay ang manglutaw nga mga basura.”
Brgy Looc-Norte, Asturias, Cebu
“Akong ireklamo ang mga opisyal sa among barangay kay wala gyud sila kaatiman sa gubaon namong karsada diri, labi na ning dalan paingon sa San Isidro nga pwerte na gyud nga dangoga. Maatiman na unta ni kay ngitngit sab nga agianan.”
Brgy Calamba, Guihulngan, Negros Oriental
“Diri sa Sitio Bitoclan pwerteng ngitngita sa karsada kay way suga labi na ang padung sa Sitio Maantol. Wala man gud pasudli sa linya sa kuryente gikan sa Negros Oriental Electric Cooperative.”
Brgy Labogon, Mandaue City
“Ayuhon na unta sa MCWD ang ilang giguba nga dalan nga lubngan unta sa tubo kay misamot man hinuon kaguba ang agianan imbes nga maayo. Hinaut nga atimanon dayon nila ang problema samtang wala pay nadisgrasya.”
Brgy Aniniaw, Libertad, Negros Oriental
“Maayo ra man sa pasalig ang mga opisyal namo diri sa barangay, labi na sa among kapitan kay wala gyud ayoha ang bati namong karsada padung sa barangay hall.”
Brgy Cajel, Borbon, Cebu
“Maayo unta og masweldohan na ang nagsemento sa karsada diri sa among lugar. Niadto pang December 1 nagsugod ang trabaho unya nahuman pagka petsa 15, pero hangtod karon wala sila sweldohi.”
Brgy Bagakay, Sogod, Cebu
“Diri sa among barangay, ang mga tanod dili man mo-duty panahon sa adlawan sa barangay hall. Kun naay magpa-summon moadto pa tawon sila sa balay sa barangay secretary kay walay masugo nga tanod.”
Brgy Sawang-Calero, Cebu City
“Mohangyo unta mi sa taga VECO nga pasigaon na unta nila ang mga suga sa poste labi na diri sa Magsaysay Street kay grabe na gyud ka ngitngit. Diri ra ba kasagaran mahitabo ang krimen kay dili kaayo makit-an ang mga badlongon sa katilingban.”
Brgy Yati, Liloan, Cebu
“Grabe na ka delikado sa karsada sa Bag-ong Dalan kay dagko man kaayo ang mga liki, ilabi na ang padung sa Kapulay. Wala gyud ni atimana sa gobiyerno bisa’g daghan na kaayo ang mga nadisgrasya nianang lugara.”
Brgy Cayang, Bogo City
“Awhag nako sa among mga opisyal sa barangay nga badlongon nila ning mga tricycle driver nga kusog kaayo magpadagan kay kuyaw kaayo sa mga bata nga manglabang sa karsada gikan sa eskwelahan.”
Brgy San Isidro, San Fernando, Cebu
“Mohangyo lang mi ni Gov. Hilario Davide bahin niining sapa diri sa among lugar kay lawom na kaayo, gisigehan og kubkob sa ubang mga tawo, unya ang among mga opisyal diri wala sab magpakabana ug gipasagdan lang ang mga mangubkobay.”
* * *
Alang sa inyong mga reklamo text lang sa 09062973166
- Latest
