Mga squatter nay tag-iya sa yuta

Di man gud ko abogado, hinungdan nga dako ang akong kalibog niining nahitabo sa Lahug, diin, human sa sunog, ang mga squatters kon kining gipalamian nila’g tawag nga informal settlers, dili mobiya sa dapit nga nasunogan sa ilang panimalay.

Ang hinungdan kay adunay nagpatuo nga ang nasunogan mao nay tag-iya sa ilang gipuy-an ug ang University of the Philippines (UP), mao nay squatter.

Makalibog no? Pagkaalaot sa UP. Dili sila makagamit sa ilang giangkon nga yuta, tungod kay dili mosugot ang City Hall, kay luoy kaayo ang mga nasunogan. Sa ato pa, dakong sala sa UP ngano nga misugot sila nga iskwatan (for free) ang ilang luna.

Unya, tungod kay ila man kunong sala ang pagpanag-iya sa yuta nga gipahimuslan sa mga squatter, mitanyag sila og relocation site, luna nga kabalhinan sa mga squatter kon informal settlers. Nganong di man illegal settlers ang ingalan kanila, tungod lang kay election year?

Apan, ang mga nasunogan wala kuno modawat sa gitanyag nga relocation site, tungod kay layo kuno kaayo ug bakilid pa. Ug tungod lagi kay election year man, sila ang magbuot og asa sila mobalhin, kun mosugot ang City Hall nga pabalhinon sila.

And again, kay election year man, kinahanglang modapig kanila ang City Hall, ug ang UP nay gipa-appear nga maoy culprit, maoy “bad boy,” maoy villain. Makalibog!

On the other hand, ngano nga dili man pud magkasabot ang mga abogado niining maong isyu? Buot ba nga ipasabot nga kun abogado pa ko karon, maglibog sab ko kun ngano nga wala nay katungod ang UP pag-develop sa ilang yuta?

Sama sa nahitabo sa budget sa City Hall, di sab magkasabot ang mga abogado, kinsa kanila ang husto, hinungdan nga walay katinoan, which budget ang tumanon, ang na-aprobahan ba nga budget, o ang budget ba sa miaging tuig?

In the meantime, ang lungsod, nagnganga, naghuwat sa dakong kahingawa. Yet silang tanan, pulos mga suloguon sa lungsod.

* * *

Kining pagka-suspenso ni Mayor Mike, iyang magamit to his advantage. Ma-full time ang iyang pagpangampanya sa walay pagpanumbaling sa mga suliran sa dakbayan, tungod kay ang tanan anaa na sa mga maayong kamot ni Acting Mayor Ed Labella.

Mahimo nga magpulong-pulong siya kada adlaw uban sa mga kapitan sa barangay ug mga constituents niini, motambong sa mga kalihokan, ma-private o ma-public, sa walay kabalaka kun duna ba siyay mga appointment o engagements sa City Hall.

After all, he is still the elected mayor of Cebu City.