Paabot sa Biyernes Kinse
Espesyal ang umaabot nga Biyernes karong semanaha alang sa 1.8 milyones ka retiradong mga kawani sa gobiyerno. Kay nianang adlawa, nga gitawag na sa pipila nga “Biyernes Kinse,” mahimo nang balaod ang dugay na kaayong gipakigbisogan nga P2,000 nga umento sa binuwan nga pension sa mga sakop sa Social Security System (SSS).
Bisan di pirmahan ni Presidente Noynoy Aquino, mahimo nang balaod ang kuridas nga umento. Kay gihatagan ang Malakanyang og 30 ka adlaw nga lugway sa pagpirma o pagsalikway sa mga balaudnon nga mapasar sa Kongreso. Mapupos ang lugway karong Enero 15 kay takdo nang usa ka buwan human napada sa Kongreso ang balaudnon niadtong Disyembre 15 sa niaging tuig.
* * *
Way ek bisan gamay ang Malakanyang mahitungod sa naaprobahan nga umento sa SSS pension. Gawas sa pagdason sa pasidaan sa Department of Finance nga mahimong mabangkarota ang SSS kun usbawan ang pension sa way tukma nga pag-usbaw sa bayranan sa aktibong mga sakop, tak-om nang palasyo human napasar sa House ug sa Senado.
Kun pirmahan ni Aquino ang balaudnon karong semanaha, uwahi na. Kulatado na siya sa mga pagsaway sa kalangay pagsagop sa benepisyo nga dugay nang gipangandoy sa mga retirado, kansang labing ubos nga binuwang pension nga P1,200 ngadto sa P2,400 kuwang sa batakang panginahanglan sa pagkaon ug tambal.
* * *
Mas laksot nga mahimo ni Aquino mao ang pag-veto o pagbasura sa balaudnon. Bisan kun kasagaran ganahang magpa-pogi sa retiradong mga kawani sa gobiyerno, kansang kahamtong mahimong maka-influencia og hangtod 6 milyones ka botanteng sakop sa ilang pamilya, mahimong maglisod nang House ug Senado pagkuha sa 2/3 nga mayoriya nga gikinahanglan pagsapaw sa veto. Gawas nga apiki na sa panahon kay siyam ka full session days na lang ang nahibilin.
Apan ang mga piliunon sa administrasyon maoy mameligrong bawosan sa retiradong mga kawani ug sa ilang pamilya. Maong ang labing maayong mahimo ni Aquino maong magpangiyugpos samtang magpaabot hangtod Biyernes.
* * *
May sukaranan si Kongresista Neri Colmenares nga mangangkon sa labing dakong bahin sa kredito sa pagpasar sa umento sa SSS pension. Kay bisan gidasonan sa mayoriya sa mga senador ug mga kongresista, siya ang labing dako og hago. Una niyang napasaka ang orihinal nga balaudnon nga nagtakda og P5,000 nga umento sa pension niadto pang 2011.
Nilahutay si Colmenares pagduso sa balaudnon bisan nakasugat og kusganong pagsupak nilang Senate Minority Leader Juan Ponce Enrile ug Senador Nancy Binay ug sa kadagkoan sa SSS ug Malakanyang. Busa ang hapit matag adlaw nga pag-apura ni Aquino sa pagpirma na sukad napasar ang balaudnon sa niaging tuig mahimong makatabang niya nga mamahimong labing unang militanteng party-list representative nga makatungtong sa Senado.
- Latest
