Debosyon ug pagtuo

Base sa Wikipedia.org 82.9 porsiyento sa populasyon sa Pilipinas mga Katoliko ug 37 porsiyento niini regular nga mosimba ug may 29 porsiyento nga niila sa ilang kaugalingon nga mga relihiyoso kaayo.

Ang Pilipinas ang giila nga dunay labing daghang Katoliko tali sa mga nasud sa tibuok Asya, samtang ang Sugbo giila nga duyan sa Kristiyanismo sa tibuok Pilipinas ug bisan sa Southeast Asia.

Giila usab ang Sugbo nga sentro sa Kristiyanismo sa tibuok Asya ug maoy spiritual Rome sa layong silangan. Mao nga dili na ikatingala nga sa matag relihiyosong kalihukan, sama sa mga fiesta, gatusan ka liboan nga mga deboto ang mohugop sa mga simbahan aron mangaliya ug mangilaba ngadto sa mga Santo nga ilang gidebosyonan.

Dinhi sa Sugbo, usa sa labing hugopan nga kapistahan mao ang pangilin ni Senyor Santo Niño matag Enero.  Gatusan ka liboan nga mga deboto ang mohugop sa Basilica Minore del Santo Niño aron motambong ug mokompleto sa siyam ka adlaw nga nobenaryo aron mangaliya ug mangilaba ngadto sa Milagrosong Bata.

Bitbit sa maong mga deboto ang dakong paglaum nga dunggon sa batang Hesus ang ilang mga pangaliya alang sa himsog nga panglawas, kalinaw sa pagpuyo, pag-asenso sa negosyo, kaayohan sa sakit ug bisan unsang matang sa petisyon magamay man o madako, bisan ang mga imposible.

Bisan ang kainit sa panahon, ang gipamati sa lawas ug daghang kakulian dili igsapayan, andam mosakripisyo basta matuman lang ang ilang panaad sa pagsimba aron dunggon ang ilang pangilaba.

Ingon niini usab ang sitwasyon sa kapistahan sa Itom nga Nazareno didto sa Quiapo, Manila. Ang uban magtiniil isip sakripisyo sa ilang pagsalmot sa prosesyon. Dili igsapayan ang kagutom, ang kahuot ug pagtudtod sa bagang duot sa katawhan basta makahawok lang sa imahen.

Karong tuiga sa pagbukas sa nobenaryo sa kapistahan ni Senyor Santo Niño, gibana-bana sa kapolisan nga moabot sa 300,000 ka deboto ang nisalmot sa "Walk with Jesus" Huwebes sa niaging semana, gikan sa Fuente Osmeña Rotunda hangtod na sa simbahan sa Basilica Minore del Santo Niño.

Wala pa kini labot sa liboan pa ka mga deboto nga naghuwat nang daan sulod sa pilgrim center.

Atol sa adlaw sa kapistahan ni Sr. Santo Niño sa nangaging katuigan, gibana-bana sa kapolisan nga nagsaka ang gidaghanon sa mga deboto nga mosud-gawas sa simbahan.

Sa niaging tuig ilang gibana-bana nga niabot sa 3.2 million ka mga deboto ang nisud-gawas sa simbahan bisan pa nga sa niaging tuig naatol usab nga niduaw sa nasud ug sa Eastern Visayas si Pope Francis.

Karong tuiga mas gipangandaman ang kapistahan ni Senyor Santo Niño tungod kay gipaabot ang sayo nga pagdagsa sa mga delegado nga motambong sa kalihukan sa International Eucharistic Congress nga mosunod dayon human sa pista senyor.

Kini ang labing unang higayon nga ipahigayon dinhi sa Sugbo, ug ikaduha sa Pilipinas, ang IEC.