Diin gikan ang milyones?

Kun ang mga kandidato maoy pasultihon atubangan sa daghang mga tawo, sila mangangkon nga nagdako sa kapobre. Ang mga kandidato nga dato nang daan, sila moangkon usab nga nakasabot sila sa kinabuhi sa mga kabus.

Apan kinsa pa kaha ang motuo sa pangangkon ni bise-presidente Jejomar Binay ug sa uban pa nga mga kandidato nga sila kabus, kun sa pasiuna pa lang nga buylo sa ilang pagpahibawo nga modagan pagka-presidente o sa bisan unsa nga posisyon sa gobiyerno, nigasto na sila og multi-million pesos sa mga political advertisement pa lang, bisan kun wala pa gani ang campaign period?

Sa report sa Philippine Star, dunay upat ka presidential aspirants nga nigasto na og P1.6 billion sa ila ra nga TV adverstisements sa niaging tuig.

Nag-una kanila si Binay (P595 Milyones), gisundan ni Senador Grace Poe (P448M), ikatulo si Liberal Party standard bearer Manuel Roxas (P424M), ug ang ika-upat ang nangangkon usab nga walay kuwarta nga si Davao City Mayor Rodrigo Duterte (P115M).

Sa mga kandidato pagka-bise-presidente, nag-una si senador Peter Alan Cayetano nga matud pa nakagasto na og  P398 Milyones, gisundan ni  Senador Ferdinand Marcos Jr. (P103M), ikatulo si Kongresista Leni Robredo (P91M), Senador Gregorio Honasan (P43M), ug ang kinagamyan og gasto nila mao si Senador Chiz Escudero (P30M).

Sa pagka-senador ang usa sa labing una nga politiko nga may national TV ad mao si Kongresista Martin Romualdez sa Leyte nga matud pa nigasto na og P310 milyones. Gisundan ni kongresista Sherwin Gatchalian sa Valenzuela (P166M) ug kanhi  Metropolitan Manila Development Authority (MMDA) chairman Francis Tolentino (P144M).

Ang ubang top spender sa ilang mga political Ads mao sila si Manila City Vice Mayor Isko Moreno, kanhi senador Panfilo Lacson, kanhi Justice Secretary Leila de Lima, kanhi Energy Secretary Jericho Petilla, kanhi TESDA chief Joel Villanueva, Senador Serge Osmeña, kanhi Akbayan representative Risa Hontiveros, Bayan Muna representative Neri Colmenares ug ang broadcaster nga si Rey Langit.

Sila maoy mga namintaha nang daan sa pagpangampanya bisan kun wala pay campaign period.

Gipahimuslan sa maong mga kandidato ang kahaguka sa balaod sa Comelec batok sa early campaigning. Apan ang dako kaayo nga pangutana dinhi kun diin gikan kining minilyon nga kuwarta niining maong mga kandidato?

Pagkadato na man lang sa ilang mga benefactor nga mohatag kanila og ingon ka dagko nga kuwarta bisan kun ang ilang gisuportahan dili klaro nga modaog.       

Ang nakapait ra ba niini nila, kun duolon na sa usa ka pobre intawon nga inahan nga nanginahanglan og kuwarta aron ikapalit og tambal sa nagmasakiton nga anak o bana, maayo na lang kun modugo ug mokuot sila sa bulsa og P500 aron ihatag.

Kuli ug ipasa-ipasa pa intawon ngadto sa mga ahensya sa gobiyerno ang mga tinuoray nga nagkinahanglan sa tabang.