Bana nakigpuyo og laing babaye

Dear Atty. Divine,

Gibiyaan ko sa akong bana usa ka tuig na ang nakalabay ug duna mi duha ka anak. Nagtrabaho ni siya kaniadto sa Manila ug wa na mopauli hangtod karon, di na siya makontak ug wa na gyud magpakabana sa iyang mga anak. Sa dihang akong gibisita ang iyang mga ginikanan sa probinsya, akong nahibaw-an nga nakigtipon diay og laing babaye ang akong bana ug may usa na sila ka anak karon. Sakit kaayo ang iyang gibuhat kanako attorney kay ako ra ang nagbuhi sa among duha ka anak ug nagkalisud-lisud gyud intawon ko. Ako ang legal nga asawa ug wa gyud magsuporta kanako ang akong bana. Unsa may angay nako nga buhaton aron manubag siya sa iyang gibuhat kanako ug sa akong mga anak? Unsay kaso nga akong ipasaka batok sa akong bana ug sa iyang kapuyo? —Lea

Dear Lea,

Kining kapakyas sa imong bana sa pagsuporta sa imong mga anak mahimo nimo siya nga ikiha og kasong criminal nga kalapasan sa Anti-violence Against Women and their Children or R.A. 9262. Kining iyang gibuhat kanimo matawag kana nga Economic abuse ug Psychological violence, ug usa kana ka kalapasan sa maong balaod. Mahimo usab nga Civil case ang imong ipasaka, pagpangayo kaniya og suporta alang kanimo ug sa imong mga anak. Samtang kalabot sa iyang pagpakigpuyo og laing babaye, mahimo nimo siyang ikiha og Concubinage base sa Revised Penal Code lakip na ang iyang kapuyo. Kun makakuha ka og kopya sa Birth Certificate sa ilang anak mas maayo kay magamit na nimo nga ebidensya batok kanila sa imong pagpasaka og kaso, ilabi na kun ang pangalan sa imong bana ang nakasuwat nga maoy amahan sa bata. Mas maayo nga moduol ka og abogado o sa PAO aron matabangan ka niining imong legal nga problema. Ikiha  gyud ang imong bana aron paghatag kaniya og leksyon sa iyang pagbiya kaninyo ug sa iyang pagka irresponsable. -Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St. Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.