Eskor ni Poe

Kun sa salida pa ni sa sine, sama sa mga pelikula ni anhing Fernando Poe, Jr. nga maoy amahan ni Senador Grace Poe, sa tunga-tunga sa salida gidabodabohan pa sa kulata ang bida nga si FPJ sa iyang numero uno nga kontrabida nga si Paquito Diaz.

Sa sitwasyon ni Senador Poe, gihansakan sa daghang disqualification case ang senador. Gikan sa isyu kun siya natural- born Filipino ba tungod sa iyang pagkakinit-an ug sa isyu sa citizenship, kun nakatuman ba siya sa 10 ka tuig nga residency sigon sa mga rekisito nga gilatid sa batakang balaod alang sa usa ka kandidato pagka-presidente sa Pilipinas.

Upat ka tawo ang nagtinabangay aron hingpit nga ma-disqualify si Poe sa iyang kandidatura sa pagka-presidente. Kini nunot sa padayong pagdominar sa ratings ni Poe sa mga survey sa pagka-presidente.

Unang naka-eskor si Poe sa pagpatigbabaw sa Senate Electoral Tribunal nga siya usa ka natural-born Filipino bisan kun siya kinit-an kon foundling.

Apan bisan og medyo nibarag, lig-on gihapon si Poe nga namahayag nga "tuloy ang laban" nunot sa mga desisyon sa First Division sa Comelec nga nikanselar sa iyang COC tungod sa giingong misrepresentation o sa iyang pagpamakak nga siya niabot na og 10 ka tuig isip Filipino human nga iyang gihukas ang pagka-American citizen ug ang pagbasura usab sa Second Division sa Comelec sa iyang COC sa isyu gihapon sa citizenship ug pagka natural born Filipino.

Napun-an pa gyud kini sa desisyon sa Comelec en Banc nga nipatigbabaw sa mga desisyon sa duha ka dibisyon.

Apan nakakita ug kaalyado si senador Poe sa Office of the Solicitor General nga nidason sa desisyon sa Senate Electoral Tribunal nga siya usa ka natural-born Filipino.

Matud ni Comelec Chairman Andres Bautista nga nihangyo na siya sa Korte Suprema nga mahatagan sila og lima ka adlaw nga lugway kay ang Korte Suprema mitakda na unta og deadline karong adlawa aron tubagon ang petisyon ni Poe nga ibasura ang ilang desisyon sa pag-disqualify kaniya.

Dugang ni Bautista nga karong dili na makapangabogar ang OSG sa Comelec, kinahanglang magsabot sila kinsa ang mobarug ug manalipod sa ilang desisyon atol unya sa oral arguments nga itakda sa Korte Suprema.

Samtang nagkaduol  ang piniliay, nag-anam usab ka "thrilling" o kakulba-hinam kun sa pelikula pa ang mahimong desisyon sa Korte Suprema nga mao na ang katapusang mohukom kun angay ba nga ilhon nga natural-born Filipino ang usa ka kinit-an ug kun nakahingpit ba sa iyang residency si Senador Poe?

Unsaon pagpanalipod sa Comelec sa ilang desisyon nga sila mismo, wala man magkahiusa niini? Puntos kaha kini ni Poe? Kana maoy atong atangan!