Panguyab sa boto sa mga Sugboanon

Walay hunong ang panguyab sa mga kandidato alang sa mga Sugboanong mga botante alang sa 2016 nga eleksiyon. Kagahapon, mianhi si Kongresista Ferdinand Martin Romualdez sa Sugbo, mi-guest sa 888 Forum sa Marco Polo Hotel ug miadto sa Punta Princesa aron manghatag og mga relief goods sa mga nasunogan sa Doña Maria Village.

Karong adlawa, anaa usab si Mayor Digong Duterte aron makig-concert sa mga nagkalainlaing organisasyon anha sa Plaza Independencia.

Si Senador Grace Poe naundang og anhi human mag-atubang og dakong suliran sa iyang disqualification case sa Comelec nga gisaka niya sa Korte Suprema. Daghang legal expert nagkanayon nga malisod nang makabangon si Grace sa iyang kaso.

Si Bise Presidente Jejomar Binay sa miagi pang tuig nagsige og anhi sa Sugbo, pero natuk-an sa dihang nangangkon sa social media nga ang Sugbo "Binay country" unya giaway sa mga netizens sa pagpataka niya’g pangangkon.

Si Mar Roxas hapit kada bulan anaa dinhi sa Sugbo. Hinuon, dili na maglisod si Roxas tungod kay tanang mga lungsod ug siyudad dinhi nakalinya man sa administrasyon nga maoy giisip nga makinarya nga makapadaog kaniya.

Niadtong miaging bulan, si Senador Tito Sotto nga kanunay no. 1 sa survey sa mga senatoriable, mi-uban nilang Maine "YayaDub" Mendoza ug Alden Richards pag-anhi sa SM Seaside.

* * *

Ang problema sa mga nasunogan nga anaa manimuyo sa yuta sa University of the Philippines dili angay gamiton sa pamolitika pinaagi sa paghatag sa mga tawo og "itom nga paglaum."

Mismo ang siyudad, pinaagi ni Acting Mayor Edgardo Labella, nasayod nga ang luna sa UP dili mahimong i-award sa mga nanimuyo kay iya kini sa UP. Kun adunay matabang ang siyudad, kana mao ang pagbalhin kanila ngadto sa desenteng relocation site.

Abi kay mga botante ang mga nanimuyo sa maong luna, patuhoon na lang sa siyudad nga dili sila mapapahawa pinaagi sa re-blocking. Dako kining sayop!

* * *

Wala nay puas ang reklamo sa mga tawo sa kabaga sa trapiko sa Mandaue. Apan hangtod karon, daw mayang-bungol kini si Mayor Jonas Cortes. Aduna na untay "intervention" nga gisugyot si Konsehal Lolypop Ouano-Dizon, apan gibabagan kini sa mayoriya sa konseho sa kahadlok nga ma-adto ang credit kang Lolypop kun masulbad ang trapiko sa Mandaue.

Kun akoy Lolypop, padayonon nako ang akong mga adbokasiya kalabot sa nagka-terible nga trapiko sa Mandaue nga sulod sa siyam ka tuig nga paglingkod ni Jonas, wala gyud masulbad.

Dili kita makapaabot og nindot nga sulbad sa trapiko gikan kang Kongresista Luigi Quisumbing kay ang background niya lehislatura, maglingkod pagpanday og balaod. Gawas pa, maglisod kini og suroy aron inspeksiyonon ang mga karsada tungod sa gidak-on niini.