Pahimulos sa kahigayonan

Duha ka dagko nga selebrasyon ang saulogon dinhi sa Sugbo sulod niining buwan sa Enero. Kini mao ang tinuig nga Sinulog Festival ug ang 51st International Eucharistic Congress (IEC).

Tungod niini, sentro kita sa atensyon dili lang lukop nasud, kun dili, sa tibuok kalibutan hinungdan nga gipangandaman gyud  kini og maayo sa mga hingtungdan aron magmalampuson ang naasoy nga mga kalihokan.

Sa Sinulog lang daan, daghan nga mga lokal ug langyaw nga turista ang naandan na nga mosaksi sa gihulagway nga "Festival of Festivals" dinhi sa Queen City of the South.

Ang uban nga mga bisita moestar pa sa Sugbo human sa Sinulog aron moderetso na lang pagsalmot sa IEC. Nasayran nga puno na ang mga hotels, ilabi na sa dakbayan sa Sugbo, tungod sa pagdagsa sa mga bisita kinsa nagpa-reserve nang daan.

Dako kaayo kini nga kahigayonan alang sa pag-promote kun unsa kanindot ang Sugbo, ilabi na sa natad sa turismo.

Apan subo nga palandungon nga gisakyan usab kini sa mga negosyante nga oportunista nga subra kaayo nga nakapasaka sa ilang room rate ug uban pa nga serbisyo. Nasayran nga ka tulo ka pilo ang gipatuman nga umento sa occupancy rate sa mga hotel ngadto sa ilang mga guests niining panahona.

Kinahanglan usab nga dili momenus sa tulo ka adlaw ang kuhaon nga room accommodation. Kahinumdoman, ingon usab niini ang issue niadtong pagpahigayon sa APEC ministerial meeting dinhi sa Sugbo.

Mahimo ra man seguro nga adunay special rate sa ingon niini nga panahon apan dili unta pasubrahan pag-ayo aron dili kita maulawan sa mata sa ato nga mga bisita.

Pastilan, pahimulos pa more!