EDITORYAL – Duterte ug ang NPA

Maayo kay gibuhian na sa mga rebeldeng New People’s Army (NPA) ang sundalo sa kagamhanan  nga ilang gibihag sulod sa 104 ka adlaw. Ang mga rebelde mibuhi sa Army corporal kaniadtong Disyembre 31 didto sa usa ka bukiran nga barangay sa Butuan City.

Kontrobersyal ang pag-release sa sundalo kay ang mga NPA didto mitugyan kaniya ni Davao City Mayor Rodrigo Duterte, kinsa kandidato pagka presidente sa nasud.

Nakapasamot kini sa pagduda nga si Duterte higala gayud sa mga NPA ug usa kini sa gikabalak-an, bisan sa iyang mga mabuot nga dumadapig, nga kun siya modaog sa eleksyon, hayan dili maayo ang sangpotan sa nasud.             Ambot og wala ba kaha magmahay si kanhi Presidente Fidel V. Ramos nga giingong usa sa mga naghulhog ni Duterte nga molansar kini sa labing taas nga katungdanan sa kagamhanan.

Sigurado nga si Ramos dili higala ug dili supporter sa mga rebelde kay nahimo man siya nga hepe sa Philippine Constabulary kaniadto, dayon hepe sa Armed Forces of the Philippines ug Defense Secretary.

Isip kandidato sa pagka presidente sa nasud, si Duterte dili angay nga mosimpatiya sa mga tawo nga naghatag lang og problema sa nasud, pinaagi sa pakiggubat batok sa kagamhanan.

Kining gipakita ni Duterte nga kasuod ngadto sa mga rebelde posible nga dili makahatag og kaayohan sa iyang kandidatura, kon dili, daghang tawo nga naghuna-huna nga anha unta kaniya mosuporta ang mousab na sa ilang baruganan.

Labaw na nga dili ganahan ug sigurado nga masuko sa gihimo ni Duterte mao ang mga sundalo nga andam mobuhis sa ilang kinabuhi tungod ug alang sa nasud.

Sigurado nga dili sila makatugot nga ang mga NPA nga ilang kontra, alalay diay sa ilang commander-in-chief, kana kun si Duterte modaog.