EDITORYAL - Bulahan ang Sugbo

Nangandam na karon ang Sugbo sa labing gipaabot niining dakong kapistahan karong bulana, ang Pista Senyor Sto. Niño nga dunganan sa kultural nga kalihokan sa Sinulog nga dugokon gyud sa mga dumuduong matag tuig.

Kung ang ubang mga lugar magmingaw na ang ilang mga dapit human  sa pagsugat sa Bag-ong Tuig, apan sa Sugbo pasiuna pa lang kadto nga kalingawan ang kapaskohan.

Karong tuiga, gawas sa Pista Senyor ug Sinulog, dinhi usab himuon ang International Eucharistic Congress 2016 nga gipaabot nga modagsa usab ang mga delegado gikan sa nagkadaiyang mga nasud ug lugar dinhi sa Pilipinas.

Human sa mga kalingawan sa Sinulog, ang mga bisita ilabi na ang mga Kristiyano mahimong mopadayon sa ilang paghudyaka ug pagpalig-on sa ilang espiritwal nga panginahanglan pinaagi sa pag-apil sa IEC 2016.

Gawas pa niana, mahimo silang manuroy sa mga maanindot nga mga tourist destinations sa nagkadaiyang kalungsoran sa Sugbo ug hasta na sa mga kasikbit nga probinsya sama sa Bohol, Siquijor ug Negros. Kining mga tinuig nga kalihokan sa Sugbo gawas lang sa IEC, nakatabang sa pagpalambo  sa lugar ilabi na sa ekonomiya niini ug bisan sa mga kasikbit niining mga isla.

Angay lang nga ikapasigarbo ang Sugbo gumikan kay gawas sa mga maanindot niining mga lugar ug malambuong modernong mga lugar, nagrasyahan usab kini og mga maayong mga lider, kay bisan pa man sa pamolitika di man mawala kanila ang pagmahal sa Sugbo.

Bulahan ang mga Sugbuanon nga wala kini makasinati og mga problema sa seguridad nga makapasamok sa kahapsay ug kalinaw niini.

Hinuon magpadayon lang kini kun dili mag-usab ang kinaiyang Sugbuanon nga mas pilion pa ang pagpaminaw ug pagpangita og solusyon inay nga mohimo og kagubot.