EDITORYAL - “Kalayaan Ato Ni”

Dul-an 50 ka kabataang Filipino ang nilampos sa malisod ug taas kaayong biyahe padung didto sa munisipyo sa Kalayaan sa West Philippine Sea sa miaging semana.

Ang maong biyahe gibansagan nga “Freedom Voyage” sa grupo nga  Kalayaan ATIN ITO Movement ug ang ilang katuyoan mao ang pagpakita nga ang maong isla iya gyud sa Pilipinas ug dili ni bisan kinsang langyaw nga nasud.

Una niini, ang maong grupo nipahibalo nga 10 mil ka mga kabataan ang moadto sa maong isla, apan makadaghang higayon silang gibabagan sa gobiyerno ilabi na sa Armed Forces of the Philippines kay kuno peligro ang biyahe. Apan dili ba gyud kaha ang tinuod niini nga nahadlok lang ang AFP ug ang Department of National Defense sa reaksyon unya sa China? Ang maong nasud niinsister nga ilaha ang tibuok WPS apil na ang  Kalayaan Group of Islands (KIG).

Ang maong unang batch sa mga kabataan giingong gipangulohan sa kanhi rebeldeng sundalo nga si Navy Captain Nicanor Faeldon.

Samtang tuod adunay mga miisa ang kilay sa iyang motibo, apan base sa nanggawas nga balita, siya lamang ug ang grupo sa maong kabataan maoy nakaako paghimo niini.

Ang angay gani gisuportahan unta sa DND ug sa AFP ang maong grupo inay nga ipahibawo pa sa tibuok kalibotan ang pagsupak sa ilang laraw.

Ang China bag-ohay lang nipadayag sa ilang kasuko bahin sa hitabo ug miawhag nga pabalikon  ang tanang mga residente ug kasundalohan niini balik sa Pilipinas.

Nganong hatagan man gyud kanunay og espesyal nga pagtagad ang kung unsay ikasulti sa China sa buhaton sa Pilipinas diha sa maong isla?

Apan nganong kinahanglan himuong isyu ang maong biyahe? Dili ba atoa man ang Kalayaan ug katungod sa matag Pilipino ang kagawasan pagbiyahe sa bisan asang dapita sa nasud?