Way Pasko ang JOs
Naglaway ang job order personnel (JOs) sa mga lalawigan, dakbayan ug kalungsoran sa makabuhong nga Christmas bonus nga gipanghatag ngadto sa mga kawani sa gobiyerno dayong Pasko karong tuiga. Wa sila maapil sa P30,000 nga nadawat sa matag regular ug kaswal nga kawani sa mga City Hall sa Cebu ug Talisay City ug sa P15,000 sa matag kawani sa Kapitolyo.
Nangreklamo ang nagpakabana nga JOs sa local government units (LGUs) nga dakong inhustisya ang paghikaw nila sa mga benepisyo kay, segun pa nila, mas bug-at ang ilang trabaho ug mas matinud-anon silang nag-alagad kay sa pipila ka regular ug kaswal nga mga kawani.
* * *
Nikakak ang LGUs paghatag og cash gifts, bonus, financial assistance ug bisan unsang dugang suholan ngadto sa JOs atol sa Pasko tungod sa pasidaan sa Commission on Audit (COA) nga ilegal ang paghatag sa maong mga benepisyo. Niinsistir ang COA nga way employer-employee relationship ang gobiyerno ug JOs.
Gidasonan nila ang baruganan sa COA nga way obligasyon ang gobiyerno paghatag sa samang suholan ug mga benepisyo ngadto sa JOs kay mas luag ang mga lagda sa pagpanguha nila sa lokal nga mga opisyal kay sa pagpasud sa regular ug kaswal nga mga kawani nga pulos may gipirmahan nga kontrata nga gisubli sa Civil Service Commission (CSC).
* * *
Masubay ang sinugdanan ning kontrobersiya ngadto ning mosunod:
Una, sa paneguro sa Department of Budget and Management (DBM) nga di mahurot ang kuwarta sa LGUs sa payroll ug mapasagdan nang mga proyekto pinaagi sa pagtakda nga ang suholan sa mga kawani (personal services) kinahanglang di molapas sa 45% sa 1st ngadto sa 3rd class provinces, cities ug municipalities ug 55% sa 4th ngadto sa 6th class LGUs; ug
Ikaduha, sa maniobra sa LGUs paglusot sa lagda pinaagi sa pagkuha og dugang mga kawani, nga usahay mas daghan pa kay sa regular ug kaswal nga mga kawani, nga habolan lang sa job orders sa ilang mga proyekto.
* * *
Gimando sa COA nga ang trabaho sa JOs kinahanglang di molapas sa unom ka buwan. Apan may JOs nga nagpabilin sa katungdanan sud na sa daghang katuigan. Uban nila wa na idestino sa mga proyekto kun dili mao nay gipahimo sa mga gimbuhaton sa regular ug kaswal nga mga kawani.
Wa kakuha og simpatiya sa publiko ang tiyabaw sa JOs tungod sa pagtuo nga pamolitika maoy nakapasud nila, nga gilaslasan ang ilang suholan aron nga mas daghang makatrabaho ug mas daghang boto ang maani sa mga politiko sa piniliay. Sa pinatuyangang pagpanguha og JOs, nakahimong lokal nga mga opisyal og duha ka bangis nga krimen: Pagwaldas sa buhis sa katawhan ug pagpangyatak sa katungod sa nagtinarung nga mga kawani.
- Latest
