Duha ka panagway sa Pasko!

Hangtod karon, adunay mga tawo nga wala pa naka-get over sa noche buena overload. Nanghinubra nga mga pagkaon ug tanlas nga bino nga mainom sa pagsugat sa Pasko.

Gani ang uban mas gipalabi na karon ang pagkaon o pagsud-an sa utan bisaya tungod kay gisum-olan na sa karne, sama sa lechon ug humba.

Apan taliwala sa kabusog nga natagamtaman sa kinabag-an, aduna usa’y mga tawo nga nagkutoy ang tiyan tungod kay bisan usa ka lugas sa bugas, wala sila’y matak-ang sa ilang kaldero.

Niadtong adlaw sa Pasko, naagian nako ang pipila ka pamilya daplin sa karsada diin didto nila gisugat ang Pasko sanglit wala na ang ilang pinuy-anan human masunog kaniadto sa Barangay Lorega-San Miguel, sama ni Carmelita uban ang unom niya ka anak. Trabaho sa iyang bana mangaykay ra og basura diin ang kita kulang ra kaayo ug dili kaigo ipalit og pagkaon katulo sa usa ka adlaw, ilabi na sa espesyal nga okasyon sama sa Pasko.

Ang kagumkom nga lechon ug uban pa nga mga lamian nga pagkaon kutob na lang sa damgo nila matilawan, sanglit inigmata nila, ang ilang madunggan mao man ang dinaguok sa nagkutoy nila nga tiyan. Literal usab nila nga nabatyagan ang katugnaw sa huyohoy sa hangin sa Pasko tungod kay wala’y salimbong ang ilang gikatulgan, diin igo lang nilang gihapinan og karton ang sidewalk nga ilang gihigdaan. As expected ang gobiyerno dayon ang gilat-an sa pagbasol tungod sa wala paghatag kanila og pagtagad. Dili ko kabasol niini nga mga tawhana kun mibati sila nga napasagdan sa kagamhanan.

Apan angayan usab nila nga hinuktokan kun ang gobiyerno ba gyud kaha ang sad-an sa ilang kalisdanan o sila mismo gumikan sa kakuwang sa ilang paningkamot tungod kay nagpadala sila sa ilang pagka tapolan? Ang kakugi ug paningkamot maoy makapahaw-as sa kalisod ug mao ang yawe sa kalamposan!