Ang lami nga makamatay

Wala'y usa kanato nga ganahan sa pagkaon, kun kini wa'y lami. Unya kun unsay namatngonan natong lamian, mao na'y permi nato nga pangitaon.

Natural kini sa tawo, ilabi na sa naanda'ng ampay sa iyang potahe. Inanay kini mawad-an sa gana, gumikan sa kapuol. Dili na makatagamtam sa kalami nga kaniadto hilabihan niini sa kalaog, nga unta mao ra man gihapon ang lami.

Kini tungod kay ang mata ug utok kakunsabo sa kapuol, nga ang gahum sa pagtilaw nawala na sa dila. Gisalig na sa ilong, nga maoy mopahugyaw sa kahumot nga i-rehistro ngadto sa pangisip ug sa makita, nga batyagon ang lami.  Dinhi nagsukad ang kausaban sa paghangop sa artipisyal nga palami.

Nawani na ang original nga lami'ng makapahimsog, kay sagad mao na'y gigamit ang mga sentetik nga 'flavors', 'seasoning',  'aroma', 'enriched' nga produkto sa pagkaon ug bisan sa pagluto sa panimalay. Kini gihimo aron ang wa na'y lami, gisahugan og mga paganang kemikals nga mahimong lamian.

Karon nga linga na kaayo kita'ng permi nagdali sa inadlaw nga gimbuhaton, gilaktud na nato ang pagkaon pinaagi sa mga 'instant foods' o 'ready to eat', nga anaay dagha'ng nakadisple sa mga grocery. Tingali daghan pa ang wala masayud sa dili maayo'ng epekto ini nga mahatag sa panglawas. Ang kadto'ng nahibalo nga bisan kini makadaut nga magkasakit, sige man lang gihapon.

Wala kuno sila'y kapilian nga mas sayon, nga di na mahasol nga dali sila makakaon. Matud pa, bahala na basta dili maulser o mamatay sa gutom. Husto baya, apan ang wala mahibaloi nga ang toksik nga mga ingrediyentes nga kemikals nga gisulod sa ginhawaan, makadulot ni'g labaw pa's makamatay.

Kay di ka man maimpas dayon apan pakamangon ka's  pag-antos sa laygay nga balatian. Ug anhi na makaamgo sa kabililhon sa husto'ng istilo sa pagkaon.