EDITORYAL – Ginansya vs konsensya

Nagsige ang panawagan sa Department of Health sa katawhan ilabi na sa mga local government units nga seryusohon ang kampanya pagpamenus sa mga mabiktima sa pabuto ilabi na sa mga bata.

Adunay mga LGUs nga nag-designate gyud og firecracker zones sa ilang mga lugar diin didto ra mahimong makapalit og mga pabuto, mao nga siguro gyud nga dili basta makakupot ang mga bata og pabuto. Apan samtang tuod nisanong ang publiko uban niini mga negosyane og pabuto ug didto lang namaligya sa firecrackers zones,  apan adunay pipila ka mga nanag-iya og mga sari-sari stores ang gahi gyud og ulo.

Sila kadtong mga dili siguro tigbasa og balita kabahin sa nahimong kadaot sa pabuto o ba kaha mga tawo ni sila nga nawong og kwarta kay mas giuna ang ginansya bahala na lang og madisgrasya ang mga bata.

Liboan na ka mga tawo ang nangamatay, nangaangol tungod sa walay kontrol nga paggamit og pabuto sa nanglabay nga mga katuigan, sa paglatas sa panahon, ang DOH daw napuno na ug niseryuso sa ilang kampanya. Apan mag-unsa lang man ang maong ahensya kun ang mga LGUs ug ang kapolisan wala magtagad niini nga kampanya?

Atong huna-hunaon nga ang kaugmaon sa mga bata mahanaw lamang tungod sa pabuto nga gipalit lang og piso?  Asa na man intawon ang konsensya aning mga naninda og pabuto?

Hangtud nga mismo na ang publiko, siguro ang ubang mga ginikanan, mga tarong nga LGUs nakaamgo nga kinahanglan silang mokooperar mao nga hinay-hinay nga namenusan ang nabuthan.

Apan karon, nabantayan gihapon nga aduna pa gihapoy mga gagmay nga tindahan ug lamesa sa suok-suok sa mga barangay nga namaligya og mga peligroso kaayong matang sa pabuto sama sa watusi, piccolo hasta ang mga dagkong triangles ug hotdogs nga pabuto.

Trabaho kini sa mga barangay officials ang pagbadlong kay dili man tanan mabantayan sa DOH ug PNP.