Dili lumad sa Mandaue; tiyabaw kay way bonus

Kun atubangon ni Mayor Rodrigo Duterte si kanhi DILG secretary Mar Roxas sa usa ka debate, makita sa katawhan kinsay nindot og nangahimo sa Pilipinas ug kinsay adunay maayong programa para sa nasud.

Una na nga nanghagit og debate si Duterte, pero sa dihang isog nga gidawat ni Roxas ang iyang hagit, nanghambog hinuon kini nga dili makig-debate sa ika-4 sa survey. Ang kampo ni Roxas daling nakaingon nga mikakak” (chicken) si Duterte.

Wala man tingale mahadlok si Duterte sa debate, apan wala usab kita masayod sa rason nganong mikakak siya sa debate nga siya ra usab ang nanghagit. Sa mga bugoy pa, “way raro.”

Nagpaabot ang mga tawo nga mosukol si Duterte kang Roxas aron makita ang katag.

* * *

Pinili ra gyud diay ang mga nagserbisyo sa dakbayan sa Sugbo nga nakadawat og P30 mil nga bonus, sumala sa mando ni Mayor Mike Rama.

Human nako gi-expose nga walay apil sa bonus ang mga Barangay Health Workers, may nanawag nako ug mitug-an nga hasta diay ang ubang barangay workers, lakip na ang mga day-care teachers walay madawdaw karong paskoha gikan sa administrayon ni Mike.

Gibasol sa babayeng nanawag ang mga sakop sa BOPK kay lagi gisultihan sila sa kampo ni Mike nga ang mga konsehal sa BOPK ang nakaingon nganong walay budget para sa bonus.

Apan sa mga balita sa pamantalaan ug radyo nagkanayon nga walay gihilabtan ang mga konsehal sa BOPK sa Supplemental Budget No. 2 nga gi-propose ni Mike.

Sa ato pa, tanan nga gilista ni Mike nga pabutangan og budget, gi-release man. Hain man diay gihapak ang budget?

* * *

Nasuko si Kongresista Luigi Quisumbing nganong adunay tawo nga milukat sa NSO-authenticated birth certificate niya diin nahibaw-an nga dili diay siya lumad sa Mandaue City tungod kay didto diay siya matawo sa Makati City.

Nganong ikasuko man ni Luigi ang tinuod? Tingale, wala ikasuko ni Luigi ang paggawas sa kamatuoran nga didto siya matawo sa kauluhan. Tingale, ang gikasuk-an niya nganong adunay tawo nga nakalukat sa iyang birth certificate didto sa Philippine Statistics Authority nga wala niya sugoa.

Dili niya angay ikasuko nganong adunay tawo (tingale, Mandauehanon) nga nagpakisayod sa iyang pagkatawo. Kay nangangkon man siyang taga-Mandaue, sibo lang nga adunay Mandauehanon nga mopakgang sa sige niyang pamakak.

Unsaon man pag-ingon ni Luigi nga aduna siyay gugma sa Mandaue kun dili diay siya lumad nga Mandauehanon?

Tinuod nga nagdugay sila sa Mandaue, apan dili tungod kay taga-diha sila, kun dili tungod sa ilang negosyo. Lahi ang residensiya, lahi usab ang lugar sa negosyo. Kun negosyo ang hisgotan, ginansiya ug paburot sa bulsa ang anaa sa utok, dili ang tiunay nga serbisyo.