Wa pa bayri sa “last pay”

Dear Atty. Divine,

Nagtrabaho ko ubos sa usa ka agency, unya nag-ilis mi og new agency kaniadtong November 1, 2015. Sa wa pa mi mag-ilis og agency, gitigum mi nga mga empleyado ug gisultian mi nga ang last pay namo October 16-30, 2015. Ingon nila nga ang among cash bond og 13th month pay among makuha after 45 days. Karon among nadunggan nga sa January na makuha namo ang maong kuwarta nga angay’ng ihatag unta kanamo kaniadtong December 15, 2015. Unsay angay namo nga buhaton attorney ug asa man kami magpatabang? Duna ba mi madawat nga separation pay sa among previous agency kay ang uban kanila nagtrabaho na sud sa tulo ka tuig? Unta imo mi nga matabangan ug matambagan sa among problema. — Erwin

Dear Erwin,

Kun hangtod karon wa pa gihapon kamo makadawat sa inyong last pay, lakip na sa inyong 13th month pay ug cash bond, mahimo kamo nga moduol sa Department of Labor and Employment (DOLE) or sa NLRC ug inyong ireklamo ang inyong agency. Ang last pay ug uban pa nga bayranan ngadto sa empleyado angayan gani nga sa katapusang adlaw sa iyang pag-report sa trabaho ihatag na ang tanan. Samtang kalabot sa separation pay kun pananglit gikonsiderar kamo nga bag-o sa gibalhinan ninyo nga agency, sa ato pa, naputol ang inyong length of service, busa mahimo mo nga mangayo og separation pay sa inyong kanhi employer ug angayang iapil kana ninyo sa pagreklamo ngadto sa DOLE. -Atty. Divine

Alang sa inyong pangutana may kalabutan sa problemang legal, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.