EDITORYAL – Sayop nga lakang

Sagad sa mga tawo nga wala gayud makasinati og kalisud, sayon-sayon ra kaayo nga mohimo og mga lakang sa wala’y paghuna-huna nga kini makapaapiki sa kinabag-ang kabus nga pamilya.

Sama sa pipila ka konsehal dinhi sa dakbayan sa Sugbo, Mandaue ug Lapu-Lapu nga mihimo og lakang aron nga pangdakpon kadtong mogamit og mga stoves nga gigamitan og Butane/LPG canisters.

Kaliboan ka pamilya, sagad kanila mga kabus, ang nakabenepisyo tungod sa paggamit nila niining maong matang sa stoves kay barato ra ang kantidad ug susama ra kun mogamit sila og kahoy’ng igsusugnod.

Kaniadto kining maong mga pamilya mag-antos sa pagputol og mga kahoy aron bughaon ug ibuwad, aron kun mauga ilang gamiton sa pangsugnod sa pagluto og pagkaon.

Resulta, nangapuo ang kakahoyan nga gipuril sa mga tawo. Kun hinuktokan pag-ayo, ang pagtumaw sa stoves nga gigamitan og Butane/LPG canisters, nakatampo pa sa kampanya sa kagamhanan kabahin sa environment.

Wala’y basehanan ang lakang sa maong mga konsehal nga did-an sa hingpit ang paggamit niining mga refilled Butane/LPG canisters kay bisan ang Bureau of Fire Protection (BFP) wala’y mapakita nga rekords nga ang mga sunog naggumikan sa paggamit sa Butane/LPG canisters.

Gani gibutyag pa sa kabomberohan nga adunay daghang sunog nga nahitabo tungod sa paggamit og gas stove nga ang tangke gibitay ug ang gas gipadagan pinaagi sa plastic hose nga dali rang dakpon sa kayo.

Kun kini maoy basehan, angay usab nga idili na ang paggamit sa mga gas stove? Bisan ang paggamit og uling nga sugnod makamugna og sunog kun ang nagluto magpabaya.

Ang angay’ng estriktuhon mao ang pag-refill sa mga tawo nga wala’y kasinatian sa maong trabaho, ilabi na kanang anaa ra sa mga panimalay, apan dili ang paggamit sa Butane/LPG canisters.