EDITORYAL - Epekto sa 14th Month Pay

Maglukso-lukso gayud sa kalipay ang mga kawani sa lainlaing kompaniya kun aprobahan ug mahimo na nga balaod ang balaudnon ni Cebu City South District Congressman Rodrigo Abellanosa nga magpahatag og 14th Month Pay.

Ang 14th Month Pay katumbas kini sa usa ka buwan nga sweldo sa usa ka kawani. Kadtong mga kawani nga nagdawat na niini nga benepisyo ila kini nga madawat sa tunga-tunga nga bahin sa tuig, apan pipila lang ang mihatag og 14th Month Pay.

Pagka karon, ang balaod naglatid pa lang nga ang mga agawon obligado ra nga mohatag og 13th Month Pay ngadto sa ilang mga kawani nga katumbas gihapon sa usa ka buwan nga sweldo.

Apan samtang nindot kaayo kining balaudnon ni Kongresista Abellanosa, adunay kabalaka nga mahulog ra kini sa walay kapuslanan kun dili kini mahuman sa pagtuki hangtod sa Hunyo 30, sunod tuig.

Samtang ikalipay pag-ayo sa mga trabahador ang paghatag kanila og 14th Month Pay kun kini hingpit nga mahimo na nga balaod, dako kini nga kasub-anan sa mga walay trabaho kay mosamot ang ilang kalisod.

Ang pagpugos nga ang mga agawon mohatag gayud og 14th Month Pay, moresulta gayud nga ang mga tagdumala og mga patigayon mopasa sa dako nilang gastohan pinaagi sa pagpausbaw sa presyo sa ilang mga baligya.

Kun mosaka na ang presyo sa mga palaliton, sama sa bugas ug ubang palitonon nga gamit kaayo sa tanan, bisan sa mga pobre, kadtong mga walay trabaho maoy labing apektado.

Ang tukma gyud unta mao nga pakubsan ang presyo sa mga palaliton aron kadtong mga tawo nga gagmay ra intawon og kinitaan makaabot sa pagpalit bisan sa ilang inadlaw nga panginahanglan.