Gahi og utok, humok og kamot!

Gipaubos sa code white alert sa Department of Health (DOH) ang tanang pampubliko nga tambalanan sugod karong adlawa isip pagpangandam sa mga panghitabo niining pagsaulog sa Pasko ug pagsugat sa bag-ong tuig.

Nagpasabot nga tanan nga mga medical personnel sa mga hospital, on call o naka-standby alang sa pag-atiman sa mga mabiktima sa mga firecrackers ug uban pa nga mga panghitabo nga maglambigit sa Yuletide Season. Kini sama sa mga mabiktima sa aksidente sa kadalanan tungod kay nagmaneho sa sakyanan nga hubog gikan sa christmas party. Kaniadto layo pa gani ang Yuletide season mohimo naman ang DOH sa ilang pagpahinumdom sa mga tawo sa paglikay sa mga pabuto aron dili madisgrasya pinaagi sa ilang kampanya nga "iwas paputok."

Gani sa panahon pa ni kanhi DOH-7 regional Director Suzana Madarieta aduna gyuy formal launching sa kampanya batok sa mga pabuto, unya sagunson nga interview sa tri-media ug press release aron masilsil sa alimpatakan sa mga tawo ang kapeligro kun dili maglikay sa mga pabuto.

Apan karon medyo nagluya man ang Iwas Paputok campaign sa health department kay ni bisan usa ka mensahe gikan sa regional director pagpahinumdom wala man? Tingali aduna lang seguro’y mas importante nga prioridad nga gitutokan. In fairness hinoon sa ubang personnel sa DOH-7, magpa-interview ra man kun tuyoon sa pag-adto sa mga tigbalita.

Alang sa mga mabuot nga mga tawo ngano nga maghulat pa man nga pahinumdoman kun unsay angayan nga likayan sanglit kita man ang mas nasayod sa atong kaluwasan?

Ang kagahi sa utok o salabotan sa tawo mosangpot sa pagkahumok sa kamot nga mabungkag kun mabuthan na sa mga firecrackers.

Mas maayo nga mogamit na lang og tambol aron wala’y mga kamot nga mapungkol, o kaha magdukdok na lang og kombo-lata aron wala’y mga mata nga mabuta!