EDITORYAL – Dalaygon ang mohatag

Dili ikalimod nga kadaghanan sa mga tawo kun moabot na gani ang Pasko malipay gayud nga adunay mohatag kanila og pinaskohan.

Kini maoy nahitabo sa kaliboan ka tawo, sagad kanila mga kabus gyud nga nangindahay nga makadawat og pinaskohan kay bisan ang kusog nga ulan wala nila tagda basta makadawat lang og pinaskohan.

Swerte ang mga tawo nga daghan ang mohatag kanila og pinaskohan, ilabi na ang mga ilado nga opisyal sa kagamhanan, kay mag-ilog man ang mga mohatag kanila og pinaskohan.

Kun adtuon nimo ang panimalay sa mga opisyal sa kagamhanan, ang ilang mga Christmas tree sulod sa ilang panimalay, gialirongan sa daghang pinutos nga pinaskohan gikan sa ilang kahigalaan ug sa mga kompaniya.

Angay nga daygon kadtong mga adunahan nga samtang malipay sila nga adunay mohatag kanila, apan mas ilang gikalipay nga sila ang makahatag og pinaskohan sa mga nanginahanglan. Matag tuig gyud, kanunay nga hugopan sa mga kabus nga katawhan ang compound sa Maranatha Christian Fellowship diha sa dalan V. Gullas kay wala’y pili ang ilang pagpanghatag og pinaskohan.

Sukad pa sa miaging semana nga sila nanghatag og pinaskohan. Bisan dili kaayo daku ang kantidad sa ilang gipanghatag nga pinaskohan apan nakahatag na sila og dakong kalipay sa mga nakadawat.

Mentras may panahon pa, angay’ng madasig unta kadtong mga adunahan nga sundogon nila ang gihimo sa tagdumala sa Maranatha Christian Fellowship nga bisan ang dili sakop sa ilang kahugpongan gipanghatagan nila og pinaskohan.

Daghan pa nga mga kompaniya ug mga tawo nga naghimo niini apan wala lang mahibaw-i sa mga tigbalita ang ilang maayong binuhatan. Angay sila nga daygon ug yukboan sa kadaghanan!