“Male” ang nabutang sa birth certificate

Dear Atty. Divine,

Duna ko’y problema sa entry sa akong Birth Certificate kay “male” man ang nabutang nga female man unta ko. Gusto ko nga mokuha og NSO alang sa akong pag-apply og passport apan segurado gyud ko nga mosango ko sa Department of Foreign Affairs tungod sa entry sa akong gender. Unsa may akong buhaton aron mas mapadali ang pag-usab sa entry sa akong gender sa birth certificate? Asa ko moduol nga opisina? — Josie

Dear Josie,

Mahimo ra nimo nga usbon ang sayop nga entry sa gender sa imong birth certificate pinaagi sa Local Civil Registrar diin ka marehistro. Ang una nimong buhaton mao ang pagkuha og listahan sa mga rekisitos nga angayan nimo nga i-submit alang sa pag-usab sa imong gender ngadto sa Local Civil Registar. Human niini, imong kuhaon ang tanang dokumento ug i-submit sa Civil Registrar uban ang imong Petition alang sa pag-usab sa entry. Apil sa mga requirements niini mao ang NBI clearance, Police Clearance, Court Clerance ug uban pa. Imo lang hangyuon ang taga Civil Registrar nga kun mahimo ipa-early endorse ang imong petition aron mapadali ang proseso. Kun mogawas na ang imong corrected nga Birth Certificate sa NSO then mahimo ka na nga mokuha og passport. Mahimo sab ka nga mangutana sa DFA kun puwede ka na ba nga mo-apply og passport samtang nagpaabot ka sa imong corrected nga NSO, pamasin lang nga motugot ra sila. Thanks and God Bless. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.