Yaya sa mga Poe mihilak

Front page news item sa Inquirer, sa ato pa, daku kaayong balita: “Ex-nanny vouches for Grace Poe.”

Sa kadaghan sa mga dagkong panghitabo sa nasud, kining paghilak sa yaya sa anak sa igsoon ni Susan Roces, usa sa giisip sa Inquirer nga dakong balita nga kinahanglan masayod ang tibuok nasud.

Giingon dinhi nga ang kanhi yaya sa banay sa mga Poe, mihilak ug lagmit nagdanguyngoy pagkahibawo niya nga gi-disqualify pagdagan pagka-presidente si Senador Grace Poe-Llamanzares.

Matud sa yaya, nakaila siya ni Grace, gikan pa sa iyang pagka-gamay’ng bata, ug nga si Poe usa ka “pure Filipino … cute and good baby.”

Alang niya si Grace maoy labing qualified nga mosulbad sa tanang problema sa nasud karon, ug iyang “ayusin” ang Pilipinas. So, alang ning maong yaya, sayop ang Comelec pag-disqualify ni Poe.

* * *

Sa iyang column nga gipatik sa lokal nga mantalaan, gitandi ni Solita Monsod ang mga dakbayan sa Iloilo ug Davao.

Una sa tanan, iyang gihisgotan ang resulta sa competition pagka-livable nga dakbayan sa nasud, gi-organize, among other organizations, sa National Competitive Council, diin ang dakbayan sa Iloilo maoy midaug pagka-Livable Cities Design Challenge 2015.

Ang second ug third places, gidaug sa mga dakbayan sa Legaspi ug Cebu, respectively.

“Where was Davao City,” nangutana si Monsod. Ang Davao City usa sa 17 ka dakbayan nga misalmot sa competition. Sa ato pa, mas livable pa diay ang atong Cebu City.

Napatik sa mga mantalaan: “Iloilo City: Safe and Livable.” Ug nangutana pag-usab si Monsod: “Is it necessary to be a human rights violator, a Dirty Harry, in order to bring peace and order to the city?”

Midugang pagsugilon si Monsod nga si Mayor Jed Mabilog sa Iloilo City, 5th place sa 2014 World Mayor prize. Ang No.1 mao si Naheed Nenshi sa Calgary, Canada, unang Muslim nga nakadaog sa maong award, diin sa mga opinion polls nga gihimo unom ka semana sa wala pa ang eleksyon, eight votes ray iyang nakuha. Apan, midaug overwhelmingly.

Ang World Mayor Prize gisugdan niadtong 2004, diin walay Pinoy Mayor nga naapil sa Top 10. Sa 2005, fourth place si Mayor Samson Rodriguez sa San Fernando, Pampanga; 2006, Makati City, Jojo Binay, 4th place (wala pay corruption issues niadtong tuiga); 2008, Marides Fernando, Marikina City, 7th place; 2010, walay naka-top ten, apan adunay nadawat nga mga testimonials si Jesse Robredo sa Naga City; 2012, Edgar Pamintuan sa Angeles City.