Nasikwate sa iyang inartista

CEBU, Philippines - Wala nay hunong ang binirahay nilang Senador Grace Poe ug Mayor Rodrigo Duterte. Wala palabya ni Grace ang panahon, namahayag kini nga ang usa ka lider kinahanglan kamao morespeto sa human rights. Iyang gitikdolan si Duterte, kinsa miangkon nga 1,700 na ka kriminal ang napatay.

Si Duterte nagpanuko unta kini sa pagdagan, apan matud niya nga kun makaangkon ang Pilipinas og presidente nga Amerikana (pasabot niya si Grace), maayong modagan na lang siya. Nahitabo kini sa dihang gibasura sa mayoriya sa Senate Electoral Tribunal ang diskuwalipikasyon ni Grace.

Naglibog gyud ko sa mga Filipino, ang binirahay nilang Grace ug Duterte nakapasaka hinuon sa ilang survey rating. Si Duterte nga sigeng pangangkon nga mogukod sa mga kriminal kun mahimong presidente, nanguna sa survey, gilumbaan na si Grace. Si Jejomar Binay misamot na og ka-us-os, malumbaan na ni Mar Roxas.

Apan hangtod asa man kining pagpanguna nila sa survey?

Karon nga gikanselar na gyud sa Comelec 1st Division ang certificate of candidacy ni Grace, dili ba kaha maapektahan ang iyang rating?

Seryoso ba kaha kanang kang Duterte? Kun seryoso pa, nganong karon ra man siya mosang-at og COC?

* * *

Gikasuko sa mga supporter sa mayor nganong gi-post sa Facebook ang litrato ni Mayor Mike Rama nga nagluhod ibabaw sa entablado nga nag-inartista ug naghilak-hilak kay lagi gisuspenso siya sa Office of the President tungod sa iyang pagpa-demolish sa center island ug street-lighting sa Labangon.

Dili angay sawayon ang reporter sa The Freeman nga mi-post sa hulagway. Ang angay sawayon mao si Mike nganong nagluhodluhod atubangan sa mga tawo.

Milupad dayon ang isyu nga politikal ang pagsuspenso ni Mike. Aw, unsa paman diay? Mao man gyud kana ang mahidangatan kun politiko ka. Mao nay giingon, sa politika ka nabuhi, sa politika usab ka matsugi.

Ang presidente, ubos sa Konstitusyon ug Local Government Code, adunay gahum sa pagsuperbisar sa mga mayor ug gobernador. Kay gahum man kana nga subay sa balaod, ang mga mayor ug gobernador, angay untang magbantay nga dili makaabuso sa gahum.

Preventive pa ang pagkasuspenso ni Mike. Pero kay gisuspenso siya, nakit-an nga adunay unod ang kasong gisang-at ni Kapitan Victor Buendia.

Dili malimod nga si Mike maayong tawo. Apan dili kana maoy importante, ang pagkamaayong tawo dili ibaylo sa paglapas sa balaod.

Sama nianang P30 mil nga bonus. Pagbuot ni Mike ang kantidad, apan wala niya hunahunaa pila ka serbisyo alang sa mga tawo ang mabiyaan sa kadaghan sa iyang hataganan nianang P30 mil nga bonus. Tulo sa mga konsehal sa BOPK ang naikog sa mga tawo. Miingon sila nga P10 mil ra ang dawaton. Apan hain kadtong naikog, mao pay gisaway sa mga tambolero ni Mike.