Mga pagsulay sa kinabuhi

Kun walay pangandoy, wala sa'y mahitabong pagsulay, kay kilatison ka man unsa ka kalig-on nga moharong o mobarug sa mga babag sa imong katakos sa paningkamot. Kun ang pursigido nimo anaa nahimutang sa alanganin o pagduha-duha, kalagmitan wa kita'y makita nga kalamboan sa pakigbisog ning kinabuhia.

Ang pagsulay aduna'y duha ka hulagway, nga mao ang kalisud ug ang kasayon sa mga butang nga atong kab-oton. Kinahanglan makat-on kita sa lintunganay nga pag-ila sa mga pagsulay, aron giyahan ta's husto'ng padulngan.

Angay kitang magmatngon sa matang sa pagsulay nga moabot sa kinabuhi. Malagmit ang kadali sa hunahuna, basi'g madani kita sa pagpili sa kasayon sa pagsulay, aron malaktud ang pagkab-ot sa mga gipangandoy sa kinabuhi.

Dinhi nasukamod ang uban, kay mao'y gipalabi ang duol ra'ng makita sa iyang panan-aw. Wala malantaw ang epekto sa unahan, nga ang kaugalingon way kasayuran nga nahimutang siya sa huyang nga pundasyon. Nga sayon ra sab ihunlak nga ilubong sa paglaum, kay wa maulay’ng malig-on sa pagsulay.

Apan ang kinabuhi nga kanunay gimanso sa makaugtas nga pagsulay, naanad sa pakigbisog sa kalisud. Wa na'y kukahadlok mosagubang sa bisan kapila ka beses pang ayagon ang kalig-on sa kaugalingon, di gayud matay-og. Maantigo moantus sa kasakit, kay sayud siya nga ang katumbas nga ganti sa pagpailob, mao ang kadato sa hiyas nga dawaton ang kamatuoran sa kinabuhi.

Nga dili ato ang pagbuot nga kita mabuhi sa kaugalingon, nga kun unsa ma'y mga pagsulay nga dangatan sa pagpakabuhi... angay kini ikalipay nato sa Kahitas-an.

Siya'y naghimo'g dalan nga subayon, nga libaongon o makaugtas man nga lakton, padulong kana sa gugma sa Dios. Iya kita'ng kuptan nga molig-on ang pagtuo'g pagsalig, sa matinud-anon nga pagsunod sa kabubot-on Niya.