Wa lang untay gubot

Nagsugod na og bukal ang politika sa bisan asang bahin sa Pilipinas karon, nag-iyahay na og diskarte ang mga politiko aron makabentaha sa ilang mga kaatbang.

Hinuon bisan unsaon og diskarte ug pasikat sa kandidato, kinahanglang di magpahaylo ang katawhan niini tungod kay ang kaugmaon sa tanan ang nakapusta niini.

Dinhi sa Dakbayan sa Sugbo, gipahamtangan og preventive suspension si Mayor Michael Rama kinsa wala usab mopakita og bayolenteng aksyon batok niini. Dili sama sa gibuhat sa ubang mga mayor nga magbarikada gyud sa city hall o munisipyo gamit ang ilang mga supporters kay dili kadawat sa legalidad sa silot.

Magpabilin lang unta nga kalmado ang tanan tungod kay ang mabutang sa risgo mao man ang kinabuhi sa mga supporters.

Dili usab mabalda ang mga transaksyon ug mga gimbuhaton diha sa City Hall pagserbisyo sa mga Sugboanon.

Niining paagiha, kun aduna may nangasuko sa mayor, dili na madugangan pa ug posible pa hinuong madugangan ang mga mosuporta kaniya.

Dili gyud ikalimod nga ang Office of the President nga mipahamtang sa maong suspensyon madudahan nga may kalambigitan sa politika ang desisyon.

Kay si Rama sakop man sa United Nationalists Alliance (UNA) kinsa adunay kandidato sa pagka-presidente sa nasud, samtang ang labing lig-ong kaatbang ni Rama sakop man sa partido sa Malacañang.

Maisip nga nakapuntos ang mga kaatbang sa mayor niini,   mapiangan man ang Team Rama kay may mga butang gyud nga di na madalidali og himo sa mayor karon nga “ordinaryo” na lang siya nga molupyo. Apan wa ba kaha masipyat niini ang mga kritiko sa mayor? Basin tungod sa nahitabo karon mas modaghan hinuon ang mosuporta kang Rama sa eleksyon ilabi na nga mas mahatagan niya og panahon ang iyang pagpangampanya ug palibot-libot sa kabarangayan ug mapasabot kanila ang iyang sitwasyon.