Suspenso tungod sa kalibog
Makapasangil si Cebu City Mayor Mike Rama nga politikanhong pagpanggukod ang pagsuspenso niya sa katungdanan sud sa duha ka buwan. Matumbok niyang mga ebidensiya sa pagpanggukod sa Malakanyang sa politikanhong mga kaatbang ang pagkasuspenso ni Dumanjug Mayor Nelson Garcia ug ang pagkasuspenso ug pagkataktak gyud gani ni kanhi Makati City Mayor Junjun Binay.
Angay hinuong pahinumdoman si Rama nga di Malakanyang kun dili ang Cebu Provincial Board maoy nagsuspenso ni Garcia ug ang Ombudsman maoy nagsuspenso ug nagtaktak sa anak ni Bise Presidente Jejomar Binay. Mahabol sab ang pasangil ni Rama kay giapil man og suspenso ug taktak sa Ombudsman ang mga alyado sa administrasyon.
* * *
Wa pa koy nahibaw-an nga mga sakop sa Liberal Party (LP) nga gisuspenso sa Malakanyang. Daghang kasong administratiba batok sa lokal nga mga opisyal, nga segurong naglakip sa mga sakop sa LP, United Nationalist Alliance (UNA) ug ubang partido, ang nag-ung-ong sa Malakanyang. Kang Rama lang ang labing uwahing naaksiyonan.
Di hinuon kapasanginlan ang administrasyon ni Presidente Noynoy Aquino nga nagpakabuta sa mga pasangil batok sa ilang mga alyado. Gani, di kasong administratiba kun dili kasong kriminal gyud--tax evasion--ang gipasaka ni Komisyonado Kim Henares sa Bureau of Internal Revenue (BIR) batok sa bana ni Consolacion Mayor Nene Alegado nga dakong opisyal sa LP sa ikaunom nga distrito sa Sugbo.
* * *
Apan ang tiyabaw ni Rama nga biktima siya sa politikanhong pagpanggukod mosumbalik niya. Kay siya ra say mabasol sa kasong nakapasuspenso niya. Siya ang nag-aprobar sa mga proyekto sa Labangon nga iyang gipaguba sa demolition team.
Samtang may katungod si Rama pag-usab sa iyang hunahuna, ang Sugbuanong mga magbubuhis maoy manubag sa kuwartang nausik. Kay nakabuylo nang konstruksiyon sa gintang gikan sa iyang paghangop hangtod sa iyang pagsalikway sa proyekto. Di mosugot ang pribadong kontraktor nga tablahon lang ang iyang trabaho. Labaw’ng di makiangayon nga mga magbubuhis maoy pabayron sa kalibog sa mayor nga balor og P300,000.
* * *
Di makatabang sa kawsa ni Rama kun awhagon ang iyang mga dumadapig sa pagbarikada sa City Hall aron pagbabag sa iyang pagkasuspenso. Mas lisod atrakahon ang mas baga nga mga dumadapig ug mas taas nga City Hall sa Makati apan nasuspenso gyud ug nataktak pa gani si Junjun Binay.
Mas makaayo alang sa tanang hingtungdan ang iyang pagdawat sa suspension order ug pakapinan og kasubo ug kahinugon nga mahikawan siya sa kahigayonan sa pag-alagad sa mga Sugbuanon. Angay siyang magpasalamat nga si Bise Mayor Edgar Labella ang mopuli niya. Ang angay niyang kabalak-an mao nga masumpayan og mas taas nga suspension order. Nga di na Team Rama ang moduma sa City Hall sa kritikal nga mga buwan dayong piniliay sa Mayo sunod tuig.
- Latest
